Panaji News: पणजीत मांडवी नदीच्या पुलावर आज ( रविवार, दि. २० ऑक्टोबर) रोजी एक भीषण अपघात झाला. ओव्हरटेक करण्याच्या नादात एका दुचाकी स्वाराने चारचाकी गाडीला धडक दिली आणि यात दुचाकीस्वार गंभीर जखमी झाला आहे. बार्देश येथील मसूद सावकार ( वय, ३१) नावाच्या या दुचाकीचालकावर सध्या बांबोळीतील गोवा मेडिकल कॉलेजमध्ये उपचार सुरु आहेत. या भीषण अपघातात दुचाकीचा तर पूर्णपणे चुराडा झालाच आहे मात्र चरचाकीचा देखील टायर फुटलाय. सध्या पणजी पोलिसांकडून या घटनेचा तपास सुरु आहे.

गोवा पोलिसांनी दिलेल्या माहितीनुसार रविवारी पहाटे ४:३० वाजताच्या सुमारास हा अपघात घडला. एक दुचाकीस्वार आजूबाजूच्या वाहनांना ओव्हरटेक करण्याचा प्रयत्न करत असतानाच त्याने समोर येणाऱ्या चारचाकीला जबर धडक दिली.

जखमी मसूद सावकार यांना त्वरित बांबोळीतील रुग्णालयात हलवण्यात आले असून त्यांच्यावर उपचार सुरु आहेत. पोलिसांना अपघाताची माहिती मिळताच पणजी पोलीस निरीक्षक विजय चोडणकर यांच्या मार्गदर्शनखाली अपघाताचा तपास सुरु झाला आणि मिळालेल्या माहितीतून हा दुचाकीस्वार बेतीहून पणजीला येत असल्याची तर चारचाकी चालक पणजीहून पर्वरीच्या दिशेने जात असल्याची माहिती मिळाली.