Kala Academy Task Force Inspection Report

पणजी: कला अकादमीच्या नूतनीकरणाच्या कामांचा आढावा घेण्यासाठी विजय केंकरे यांच्या अध्यक्षतेखाली नेमलेल्या कृती दलाची मंगळवारी सकाळी बैठक पार पडली.

त्यात ध्वनी योजना रॉजर ड्रेगो, प्रकाश योजनेविषयी शीतल तळपदे आणि आर्किटेक्टविषयी राजन भिसे यांनी परीक्षण केले आहे आणि ते एका आठवड्यात त्यांचा अहवाल सादर करतील, त्यानंतर तो अहवाल सरकारला सादर होईल आणि त्यावर आम्ही पुढील निर्णय घेऊ अशी माहिती केंकरे यांनी दिली.

गोवा मनोरंजन संस्थेत झालेल्या बैठकीत कृती दलाचे इतर सर्व सदस्य, विविध खात्याचे अधिकारी व पदाधिकारी उपस्थित होते. अकादमीच्या नूतनीकरणाच्या कामानंतर मुख्य सभागृह नाटकांसाठी खुले झाले, तेव्हापासून झालेले काम हे सदोष असल्याची टीका होऊ लागली. या कामाला आक्षेप घेतल्यानंतर राज्यातील नाराज कलाकारांनी कला राखण मांड नावाची संस्था स्थापन केली.

या राखण मांडने वारंवार कला अकादमीच्या कामावर आवाज उठविला, तसेच निर्माण झालेल्या कामातील दोष दाखवून दिले. मांड स्थापन झाल्याने कलाकारांचे दोन गट झाले. परंतु या सर्वात या नूतनीकरणाच्या कामातील दोषाला सार्वजनिक बांधकाम खाते जबाबदार असल्याची टीका होत होती. त्यामुळे ते खाते सांभाळणाऱ्या मुख्यमंत्री प्रमोद सावंत यांनी ज्येष्ठ निर्माते व दिग्दर्शक विजय केंकरे यांच्या अध्यक्षतेखाली अकादमीच्या कामांचे परीक्षण करण्यासाठी कृती दलाची स्थापना झाली होती.