सांगे: तारीमळ सांगे या प्रभागातील दोनशेहून अधिक महिला पुरुष बेंडवाडा पुलाजवळ एकत्र जमल्याने काही वेळ तणावाचे वातावरण निर्माण झाले होते. सांगेचे मामलेदार सिद्धार्थ प्रभू आणि पोलिस निरीक्षक धितेंद्र नाईक घटना स्थळी दाखल होऊन परिस्थिती समजून घेतली.

बेंडवाडा येथे नवीन पूल बांधकाम सुरू असून तारीमळवासीयांसाठी रस्त्याची हवी तशी तरतूद न केल्यामुळे बांधकाम अधिकाऱ्यांना घटनास्थळी बोलाविण्याचा आग्रह धरला होता. पण अधिकारी सोमवारी सकाळी १०.३० वाजता येणार असल्याचा संदेश मिळाल्याने गर्दी हळू हळू कमी होत गेल्याने पोलिसांनी समाधान मानले.

सविस्तर घटनेनुसार बेंडवाडा येथील नवीन पूल बांधकाम सुरू असताना तारीमळ येथील चारशेपेक्षा अधिक लोकवस्ती असलेल्या गावाला रस्ता जोडताना त्रुटी ठेवल्यामुळे नागरिकांनी संताप व्यक्त केलाहोता.

‘तू तू मै मै’

कॅरोज क्रुज म्हणाले, आपण रस्ता तयार करण्यासाठी अधिकारी व स्थानिक आमदार सुभाष फळदेसाई यांच्याकडून लोकांसमवेत शब्द घेतला आहे. त्यानुसार रस्ता होईल. दुसऱ्या प्रभागातील नगरसेवकांनी येथे येऊन राजकारण करू नये, असा चिमटा नगरसेवक मेशू डिकॉस्ता यांना काढला. त्याला प्रत्युत्तर देताना मेशू डिकॉस्ता म्हणाले, तारीमळ येथील लोकांनी बोलाविल्यामुळेच मी आलो असून मातीवर काँक्रिट घातले जात आहे हे कोणीही पाहावे.