काणकोण: तळपण येथून मासेमारीसाठी गेलेले चार मच्छिमार अखेर तब्बल १२ तासांच्या धाकधुकीनंतर सापडले. पेट्रोल संपल्यामुळे त्यांची बोट समुद्रात भरकटली होती. मंगळवारी सायंकाळी सुमारे चार वाजता ही बोट अंकोला (कारवार) परिसरात आढळून आली असून, सर्व मच्छिमारांना सुखरूप तळपण जेटीवर आणण्यात आले.

भरकटलेली ही बोट सागर गोकुळदास नमशीकर यांच्या मालकीची असून, बोटीत संदीप आरोलकर, चेतन आरोंदकर, अनिकेत गोवेकर आणि सागर नमशीकर हे चार खलाशी होते. सर्व मच्छिमार सुखरूप असल्याची माहिती क्षत्रिय पागी समाजाचे अध्यक्ष रूद्रेश नमशीकर यांनी दिली.

दरम्यान, किनारी सुरक्षा दलाचे पोलीस निरीक्षक टेरेन्स डिकॉस्टा हे आपल्या पथकासह शोध मोहिमेसाठी समुद्रात उतरले होते. त्यांनीच मच्छिमार आणि बोट सुरक्षित असल्याची अधिकृत माहिती दिली. सायंकाळी सुमारे ७.३० वाजण्याच्या सुमारास बोट तळपण जेटीवर दाखल झाली. दीर्घकाळ उन्हात अडकल्यामुळे सर्व मच्छिमार थकलेले व त्रस्त अवस्थेत असल्याचे डिकॉस्टा यांनी सांगितले.

दोन तास महामार्ग रोखला

मच्छिमारांचा शोध घेण्यासाठी प्रशासनाकडून तातडीची पावले उचलली जात नसल्याच्या निषेधार्थ मच्छिमारांनी मंगळवारी दुपारी मडगाव–कारवार हमरस्ता अडवून आंदोलन केले. यावेळी गोवा फॉरवर्ड पक्षाचे मोहनदास लोलयेकर, पंकज नमशीकर, नगरसेवक रमाकांत नाईक गावकर, शुभम कोमरपंत यांच्यासह मच्छिमार उपस्थित होते.

दक्षिण गोवा पोलीस उपअधीक्षक निलेश राणे यांनी घटनास्थळी धाव घेत आंदोलनकर्त्यांची समजूत काढण्याचा प्रयत्न केला. कोस्ट गार्डच्या हेलिकॉप्टरद्वारे शोधमोहीम राबवावी, अशी मागणी क्षत्रिय पागी समाजाचे अध्यक्ष रूद्रेश नमशीकर यांनी केली होती. दरम्यान, सकाळी आदिवासी कल्याण मंत्री रमेश तवडकर यांनी तळपण जेटीवर भेट देत परिस्थितीची पाहणी केली होती.