Panjim Smart City Project: राजधानी पणजीमध्ये सध्या स्मार्ट सिटी प्रकल्पाचे काम जोरात सुरू आहे. परंतु कंत्राटदार निकृष्ट दर्जाचे काम करत असल्याचा व्हिडिओ व्हायरल झाला आहे.

स्मार्ट सिटीची कामे विविध खात्यांमार्फत देण्यात आली असून एखाद्या कंत्राटदाराने दुय्यम दर्जाचे काम केले, तर त्या कंत्राटदारावर संबंधित खात्याने कारवाई करावी.

मात्र, एकदा काम पूर्ण झाल्यानंतर त्यात बिघाड झाल्यास सरकार कारवाई करील, असे महसूलमंत्री आतानासियो उर्फ बाबूश मोन्सेरात यांनी स्पष्ट केले.

पर्वरी येथील विधानसभा संकुलात ते पत्रकारांशी बोलत होते. फेरीबोट धक्क्याजवळ सुरू असलेल्या कामात सिमेंट कॉंक्रिटसाठी कामगार मांडवी नदीचे खारे पाणी वापरत असल्याचे उघड झाले आहे.

संबंधित कंत्राटदार समोरच उभा राहून हे पाहात असल्याचे व्हिडिओत दिसत आहे. सार्वजनिक बांधकाम मंत्री नीलेश काब्राल यांनी आपण या प्रकरणात लक्ष घालणार असल्याचे सांगितले होते. स्मार्ट सिटीच्या कामाबाबत सध्या सरकारवर जोरदार टीका होत आहे. त्यातच हे प्रकरण समोर आल्याने सरकारवरील टीकेचे प्रमाण वाढले आहे.