पणजी: समुद्रातील वाढत्या प्रदूषणाबाबत जागरूकता निर्माण व्हावी या उद्देशाने मुंबईतील २० वर्षीय हेजल रायकुंदालिया या ‘एमबीबीएस’च्या विद्यार्थीनीने गोव्यात शनिवारी एक मोठे आव्हान पेलले. तिने कुठ्ठाळी ते मिरामार असे २२ किमीचे खुल्या समुद्रातील अंतर पोहून पार केले. यासाठी तिला ४ तास २६ मिनिटांचा वेळ लागला.

हा मार्ग सलगपणे पोहणारी ती एकमेव जलतरणपटू आहे. तिच्या या कामगिरीचे गोवा क्रीडा प्राधिकरणाचे कार्यकारी संचालक अजय गावडे यांनी खास अभिनंदन केले आहे. मुंबईच्या हेजलने गोव्यात येउन पर्यावरणाबाबत दिलेला संदेश अमूल्य आहे. भारतीय समुद्रकिनारा स्वच्छ राहावा, यासठी ती ‘स्विम फॉर सी’ ही मोहीम राबवत आहे.

त्याचाच एक भाग म्हणून तिने गोव्यात कुठ्ठाळी ते मिरामार असे २२ किमी अंतर पोहण्याचा मार्ग निवडला. अत्यंत खडतर असे आव्हान तिने सहज पार केले. वैद्यकिय क्षेत्राचे शिक्षण घेत असतानाही केवळ छंद आणि सामाजिक जबादारीची जाण असणाऱ्या हेजलने केलेली ही कामगिरी काैतुकास्पद आहे, असे गावडे यांनी म्हटले आहे.

त्यापूर्वी, पत्रकार परिषदेत राष्ट्रीय जलक्रीडा संस्थेचे (एनआयडब्ल्यू) नोडल ऑफिसर डॉ. पवन गुप्ता यांनी हेजलच्या कामगिरीचे काैतुक केले. सध्या करिअरची चिंता लागलेल्या युवकांसाठी हा मोठा आदर्श आहे. हेजल वैद्यकिय शिक्षणाचे ओझे सांभाळत आपला पोहण्याचा छंदही जोपासत आहे. खुल्या समुद्रात पोहण्यासाठी प्रबळ मानसिकता गरजेची असते.

हेजलने ती दाखवून दिली आहे. गोवाचा समुद्रकिनारी हा खूप सुंदर आहे. हा किनारा स्वच्छ, सुंदर आणि प्रदुषणविरहीत राहावा, यासाठी १९ वर्षीय युवती राबवित असलेल्या मोहीमेची मी खास अभिनंदन करतो. तिला पुढील वाटचालीसाठी शुभेच्छा देतो. दरम्यान, पत्रकार परिषदेत हेजलचे वडिल मिथेश रायकुंदालिया, प्रशिक्षक उमेश उत्तेकर, सुबोध सुळे व इतर मान्यवर उपस्थित होते.

समाधानकारक अनुभव

मी गोव्यात पहिल्यांदाच खुल्या समुद्रात पोहली आहे. येथील स्वच्छ पाण्याच्या मी प्रेमात पडली आहे. मी देशाबरोबरच विदेशातही पोहले आहे. मात्र गोव्यातील अनुभव माझ्यासाठी अविस्मरणीय होता. मी यापूर्वी बांद्रा-वर्ली सी लिंक ते गेटवे ऑफ इंडिया असा तब्बल ३६ किमीचा खुल्या समुद्रातील प्रवास यशस्वीपणे पार केलेला आहे. परंतु, गोव्यातील अनुभव माझ्यासाठी खास आहे.