मडगाव: मडगाव येथील सराफ स्वप्निल वाळके खून प्रकरणातील संशयित ओंकार पाटील याला दक्षिण गोवा सत्र न्यायालयाने तीन महिन्याचा अतिरिक्त अंतरिम जामीन मंजूर केला आहे. वडिलाला प्रोटेस्ट कॅन्सर असल्याने व त्याची दृष्टीही अंधूक होत गेल्याने त्याच्या देखभालीसाठी गरज असल्याने जामिनात वाढ करावी, अशी मागणी संशयिताने न्यायालयात केली होती.

या जामीन अर्जावर न्यायालयात (Court) युक्तिवाद झाला. सरकारी वकील एस. सामंत यांनी जोरदार विरोध केला. संशयितावर गंभीर स्वरूपाचा गुन्हा दाखल आहे. वाळके खून प्रकरणातील तो मास्टरमाईंड आहे. त्याच्यावरील गुन्हा सिद्ध झाल्यास, मृत्युदंड वा जन्मठेपेची शिक्षा होऊ शकते, अशाला जामीन मंजूर करू नये असा युक्तिवाद सरकारी वकिलाने केला.

तर संशयिताच्या वकिलाने आपल्या अशिलाने जामिनावर असताना कुठलाही गुन्हा केला नाही, तसेच वाळके खून प्रकरणाच्या सुनावणीस तो नियमित हजर राहिला आहे. त्याची आई वृद्ध आहे. वडिलाची देखभालीसाठी त्याला ज्यादा जामीन द्यावा, अशी मागणी केली. न्यायालयाने दोन्ही पक्षाची बाजू ऐकून घेऊन मानवतावादी दृष्टीने त्याला तीन महिन्याचा अंतरिम जामीन देण्यात येत असल्याचा निवाडा दिला.

सप्टेंबर २०२० साली मडगावात (Margao) कृष्णी ज्वेलर्सचे मालक स्वप्नील यांचा भरदिवसा गोळ्या झाडून खून झाला होता. या प्रकरणात मागाहून क्राइम ब्रँचने ओंकार पाटील, मुस्तफा शेख व इव्हेंडर रॉड्रिग्ज यांना अटक केली होती. संशयितांना पिस्तूल विकल्यासंबंधी नंतर बिहार राज्यातून शनी कुमार, राहुल कुमार व कुंदन कुमार यांना अटक केली होती.