Babush Monserrate: राज्य सरकारातील महसूलमंत्री बाबूश मोन्सेरात संशयित आरोपी असलेल्या लैंगिक अत्याचार प्रकरणासंबंधीच्या खटल्यात मडगावच्या मुख्य सत्र न्यायालयाने दोन साक्षीदारांना या प्रकरणासंबंधी न्यायालयात साक्ष देण्यासाठी समन्स बजावण्याचा बुधवारी आदेश दिला.

सरकार पक्षाच्या वतीने सरकारी वकील व्ही.जी. कॉस्ता न्यायालयात उपस्थित होते. संशयित मोन्सेरात यांच्यावतीने गुरुवारी न्यायालयात ॲड. डी. धोंड हजर होते तर दुसरी संशयित महिला रुजारिया ऊर्फ रोजी फेर्रोस यांचे प्रतिनिधित्व ॲड. ए. कुडतरकर करीत होते.

बुधवारी झालेल्या खटल्याच्या सुनावणीच्यावेळी संशयित मंत्री बाबूश मोन्सेरात न्यायालयात उपस्थित नव्हते. न्यायालयाने त्यांना गैरहजर राहण्यास अनुमती दिलेली आहे आणि त्याच अनुषंगाने संशयित मोन्सेरात न्यायालयात गैरहजर होते.

पणजीच्या महिला पोलिस स्थानकात याप्रकरणी वरील दोन्ही संशयितांविरुद्ध भारतीय दंड संहितेच्या ३७६ (लैंगिक अत्याचार करणे), ३४२ (अडवणूक करणे), ५०६ (धमकी देणे) तसेच ‘पॉक्सो’ कायद्याच्या ४ कलमाखाली आणि इन्फॉर्मेशन टेक्नॉलॉजी कायद्याच्या ६७-ब (सी) कलमाखाली गुन्हा नोंद केलेला आहे. या खटल्याची पुढील सुनावणी आता नोव्हेंबर महिन्याच्या पहिल्या आठवड्यात होणार आहे.