मडगाव : युक्रेन-रशियाच्या युद्धातून (Russia Ukraine war) विदारक आणि दु:खदायक बातम्या देशाच्या वाटणीला येत असताना गोवेकरांसाठी दिलासादायक बातम्या मिळू लागल्या आहेत. युक्रेनमध्ये (Ukraine)शिकणारा होंडा सत्तरी येथील सुधांशू शशांक सालगुडे हा 20 वर्षीय विद्यार्थीही मायदेशी परतला असून तो आज सकाळी नवी दिल्लीत पोहोचला. (Russia Ukraine war Ukraine Russia Student Romania Goa)

एनआरआय आयुक्तांच्या कार्यालयातून मिळालेल्या माहितीनुसार, या विद्यार्थ्यांने आपली तिकीट गोव्यापर्यंत पाहिजे असे सांगितले नव्हते. त्यामुळे त्याचा प्रवास दिल्लीपर्यंतच होऊ शकला. आम्ही त्याची राहाण्याची सोय गोवा सदनमध्ये केली होती. मात्र त्याने आपल्या एका मित्रा बरोबर स्वतंत्रपणे राहणे पसंत केले, अशी माहिती एनआरआय संचालक अँथनी डिसोझा यांनी दिली.

दरम्यान, तीन गोमंतकीय विद्यार्थी (Student) रोमेनियात (Romania) पोहोचले असून त्यांना गोव्यात (Goa)पाठविण्याचे सोपस्कार आणखी तीन दिवसात होणार आहेत. तर आणखी तीन विद्यार्थीनी ज्या हंगेरीच्या बाजूने बाहेर पडल्या होत्या त्यांनी युक्रेनची सीमा ओलांडून हंगेरी देशात प्रवेश केला आहे, अशी माहिती ही डिसोझा यांनी दिली.