पणजी : ज्ञानवापी मशिदीनंतर आता राज्यातही काही ठिकाणी अवशेष सापडू शकतात, अशी माहिती देत अशा जागांच्या सर्वेक्षणाची मागणी वीजमंत्री सुदिन ढवळीकर यांनी केली आहे. मात्र, अशा काही जागांची माहिती असल्यास ती पुरातत्व खात्याकडे सादर करावी. खाते या जागांचे सर्वेक्षण करू शकते, अशी माहिती आज पुरातत्व खात्याचे मंत्री सुभाष फळदेसाई यांनी दिली.

सध्या देशभर उत्तर प्रदेशातील ज्ञानवापी मशिदीमध्ये सापडलेल्या शिवलिंगाची चर्चा सुरू आहे. याबाबत गोव्याचे वीजमंत्री आणि मगोपचे नेते सुदिन ढवळीकर यांना पत्रकारांनी विचारले असता, राज्याच्या इतिहासामध्ये धार्मिक स्थळांची पाडापाडी आणि धर्मांतर झाल्याचे स्पष्ट आहे. त्यामुळे उत्तर प्रदेशातील घटनेप्रमाणे राज्यातील काही ठिकाणी सर्वेक्षणाची आवश्‍यकता आहे, अशी मागणी धार्मिक संत, भक्तजन, कुळावी, संस्थान पदाधिकारी यांची आहे. त्यामुळे पुरातत्व खात्याच्या अधिकाऱ्यांनी यात लक्ष घालून त्यांना आवश्‍यक वाटत असल्यास सर्वेक्षण करावे, असे मत व्यक्त केले होते.

दरम्यान जर राज्यातील अशा काही जागा मंत्री सुदिन ढवळीकर यांना माहीत असतील तर त्यांनी त्याची सविस्तर माहिती राज्याच्या पुरातत्व खात्याकडे सादर करावी. पुरातत्व खाते संबंधित जागांचे सर्वेक्षण करेल, असं आश्वासन पुरातत्व खात्याचे मंत्री सुभाष फळदेसाई यांनी दिलं आहे. त्यामुळे ढवळीकरांच्या वक्तव्यानंतर आता गोव्यातही हा नवा वाद निर्माण होण्याची शक्यता आहे.