Goa Stray Dog Attack News

सासष्टी: गेल्या काही आठवड्यात केळशी व मोबोर समुद्रकिनाऱ्यांवर श्वानांचा उपद्रव वाढला असून आतापर्यंत जवळपास १४ लोकांना श्वानांनी चावा घेण्याच्या घटना घडल्या आहेत. याची गंभीर दखल घेत केळशी पंचायतीने येथील समुद्रकिनाऱ्यांवर श्वानांना खायला घालण्यास बंदी घातली आहे.

रविवारी (दि.१२ जानेवारी) सरपंच डिक्सन वाझ, स्थानिक पंच डिकॉस्ता आणि स्थानिकांनी मोबोर व केळशी समुद्रकिनाऱ्यांवर फेरफटका मारला व स्थितीचा आढावा घेतला. काही लोक व पर्यटक संध्याकाळच्या वेळी समुद्रकिनाऱ्यांवर कुत्र्यांना खायला घालतात.

नियमित नसले तरी अधूनमधून हे प्रकार चालतात. त्यामुळे श्वानांना चटक लागली आहे. संध्याकाळच्या वेळी खायला मिळाले नाही तर ते आक्रमक होतात, असे स्थानिक पंच व वॉटर स्पर्ट्‌स चालविणारे डिकॉस्ता यांनी सांगितले. माजी पंच सोफिया सिल्वा मोंतेरो या सध्या केळशी पंचायतीच्या श्वान आश्रय घराची देखरेख करतात.

सरपंचांचे आवाहन

केळशी पंचायतीने यापूर्वीच श्वानांसाठी आश्रय घर सुविधा उपलब्ध केली आहे. किनाऱ्यांवरील भटक्या श्वानांना खायला घालण्यापेक्षा आश्रय घरांतील श्वानांना खायला घाला, असे आवाहन केळशीचे सरपंच डिक्सन वाझ यांनी लोकांना केले आहे. ज्या कुणाला श्वानांना खायला घालायचे असेल, त्यांनी पंचायतीकडे नोंदणी करावी.