सासष्टी: सरकारतर्फे चालू असलेले गोव्यातील सर्व मेगा गृह निर्माण प्रकल्प थांबवण्याची मागणी अलाहाबाद उच्च न्यायालयाचे निवृत्त न्यायमूर्ती फर्दिन रिबेलो यांनी चांदर येथील ‘इनफ इज इनफ’ चळवळीअंतर्गत शनिवारी घेतलेल्या नागरिकांच्या बैठकीत केली आहे.

या प्रकल्पांना मान्यता देण्यापूर्वी गावाची क्षमता जाणून घेणे अंत्यंत आवश्यक आहे. आमची चळवळ ही राष्ट्रपिता महात्मा गांधी यांनी घालून दिलेल्या सत्याग्रहाच्या मार्गाने चालू आहे व त्यातून गोव्याला सावरण्याचा,

गोव्याची ओळख अबाधित राखण्यासाठी आमचा प्रयत्न आहे, असे रिबेलो यांनी स्पष्ट केले. बैठकीनंतर पत्रकारांशी बोलताना न्या. फर्दिन रिबेलो यांनी स्पष्ट केले की, नवीन राजकीय संस्था स्थापन केली जाणार नाही.

न्यायमूर्ती या नात्याने आपण संविधानाचे रक्षण करण्याची शपथ घेतली आहे, ते मोडण्यासाठी नाही, असेही त्यांनी सांगितले. ‘इनफ इज इनफ’ चळवळीतील सदस्य राजकीय पक्षांशी संबंधित नाहीत, असेही ते म्हणाले.