Goa Taxi Young Entrepreneur Scheme: गोंयचो टॅक्सी पात्रांव योजनेस (गोवा वाहतूक उद्योजक योजना) आज मुख्यमंत्री डॉ. प्रमोद सावंत यांनी प्रारंभ केला.

या योजनेमुळे ग्रामीण भागातील प्रत्येक घरात टॅक्सी पोहोचणार असून लोकांना स्वयंपूर्ण करणारी ही योजना असून याचा लाभ गोमंतकीयांनी घेतला पाहिजे, असे मत डॉ. सावंत यांनी व्यक्त केले.

यावेळी त्यांच्यासोबत वाहतूकमंत्री माविन गुदिन्हो, पेडण्याचे आमदार प्रवीण आर्लेकर, गोवा माईल्सचे मुख्य कार्यकारी अधिकारी उत्कर्ष दाभाडे उपस्थित होते.

मुख्यमंत्र्यांच्या हस्ते योजनेअंतर्गत 55 लाभार्थींना टॅक्सी सुपूर्द करण्यात आल्या. या योजनेतून एकही पैसा न देता लाभार्थीला टॅक्सी मिळणार आहे. यासाठी प्रारंभी पेडणेवासीयांना प्राधान्य दिले आहे, असे डॉ. सावंत यांनी स्पष्ट केले.

बसेससाठीही योजना!

कोरोना महामारीनंतर अनेक खासगी बसेस बंद झाल्या. त्यामुळे आता नागरिकांची गैरसोय होत आहे. त्यासाठी ‘गोंयचो टॅक्सी पात्रांव’ योजनेच्या पार्श्‍वभूमीवर नवी योजना सुरू केली जाईल, ज्यात खासगी बसेस भाडेपट्टी घेतल्या जातील.

कदंब महामंडळाद्वारे ही योजना चालवण्यात येणार असून खासगी बसेसवर कदंबचे वाहक असणार आहेत, अशी माहिती वाहतूक मंत्री गुदिन्हो यांनी दिली.

सीएनजी, ई-चार्जिंग सुविधा

‘गोंयचो टॅक्सी पात्रांव’ योजनेत दिल्या जाणाऱ्या टॅक्सी सीएनजीवर चालणार असून टॅक्सी व्यवसाय पर्यावरणपूरक होईल, असे सरकारचे धोरण आहे.

त्यासाठी वर्षभरात बस स्थानक, रेल्वे स्थानक, पेट्रोल पंप या ठिकाणी सीएनजी आणि ई-चार्जिंग सुविधा सक्तीच्या केल्या जातील. यापुढे टॅक्सी व्यवसायात ई- वाहनांचा वापर होणार आहे. ग्राहकांनाही सवलतीच्या दरात प्रवास करता येईल, असे सावंत म्हणाले.