सा जुझे दी आरियाल ग्रामपंचायत पुन्हा एकदा चर्चेत आली आहे. पंचायतीच्या समोर असलेला संत जोसेफ यांच्या पुतळ्याची विटंबना करुन चोरी केल्याची धक्कादायक घटना उघडकीस आली आहे. याप्रकरणाची गंभीर दखल घेऊन पोलिस घटनास्थळी दाखल झाले आहेत.

समोर आलेल्या माहितीनुसार, सा जुझे दी आरियाल ग्रामपंचायतीच्या कार्यालयासमोर संत जोसेफ यांचा पुतळा आणि क्रॉस उभारलेला आहे. दरम्यान, क्रॉस जवळील संत जोसेफ यांच्या पुतळ्याची विटंबना करुन त्याची चोरी करण्यात आल्याचा धक्कादायक प्रकार उघडकीस आला आहे. याप्रकरणी पोलिसांकडे तक्रार दाखल करण्यात आली असून, पोलिस घटनास्थळी दाखल झाले असून, तापस केला जात आहे.

घटनेची माहिती मिळताच पोलिस घटनास्थळी दाखल झाले आहेत. तसेच, फॉरेन्सिक पथक आणि स्निफर डॉग देखील घटनास्थळी दाखल झाले आहेत. गावकऱ्यांनी या घटनेचा निषेध केला असून, कोणतरी गावातली शांतता भंग करण्याचा प्रयत्न केल्याचा आरोप त्यांनी केला आहे. याप्रकरणी दोषींवर कडक कारवाई करण्याची मागणीही स्थानिकांनी केली आहे.

सा जुझे दी आरियाल पंचायतीत यापूर्वी छत्रपती शिवाजी महाराज्यांच्या पुतळ्यावरुन वाद झाला होता. शिवजंयतीच्या दिवशी पुतळ्याचे उद्धाटन करण्यासाठी आलेल्या सामाज कल्याण खात्याचे मंत्री सुभाष फळदेसाई यांच्यावर धावून जाण्याचा प्रकार घडला होता. दरम्यान, आता संत जोसेफ यांच्या पुतळ्याची विटंबना करुन पुतळा चोरी केल्याची घटना घडल्याने गावात काहीसे तणावाचे वातावरण निर्माण झाले आहे.