पणजी: सांतआंद्रेचे आमदार वीरेश बोरकर यांची सत्ताधाऱ्यांशी विशेषतः मुख्यमंत्री डॉ. प्रमोद सावंत यांच्याशी वाढलेली जवळीक सध्या चर्चेची ठरली आहे. सांतआंद्रे मतदारसंघातील भू-रुपांतराविरोधात बोरकर यांनी केलेले आंदोलन आणि त्याला मुख्यमंत्र्यांनी दिलेला प्रतिसाद पाहता या चर्चेत तथ्य असावे.

या साऱ्याची दृश्य सुरवात विधानसभा अधिवेशनावेळी झाली. सांतआंद्रे मतदारसंघातील प्रश्न बोरकर मांडत असताना सत्ताधारी बाकांवरून त्याकडे फारसे गांभीर्याने पाहिले जात नसे. काही मोघम उत्तरे देत वेळ मारून नेली जात असे. बोरकर पोटतिडकीने, मुद्देसूदपणे बोलत; पण सरकारच्या लेखी त्याचे महत्त्व फारसे नसे. मुख्यमंत्रीही थेट आश्वासन देण्याचे टाळणे पसंत केले होते.

अलिकडे मात्र ती परिस्थिती पालटली होती. आपण विरोधकांचीही कामे करतो असे सांगताना विधानसभेत मुख्यमंत्री बोरकर यांचा दाखला देत होते. तेही त्याला विरोध करत नव्हते. विरोधकांसोबत बोरकर सत्ताधाऱ्यांविरोधातील आंदोलनात जरूर होते; मात्र देहबोलीवरून सत्ताधारी आणि त्यांच्यात फारसे मतभेद राहिले नव्हते, असेच दिसून येत होते.

त्यानंतर सुरू झाले ते सांतआंद्रे मतदारसंघात नगरनियोजन कायद्याच्या ३९-अ कलमांतर्गत मंजूर केलेले प्रकल्प/भू रुपांतरांविरोधातील आंदोलन. या आंदोलनामुळे बोरकर राज्यव्यापी नेते झाले. सरकारविरोधात चार हात करण्याची ताकद असलेला आमदार म्हणून त्यांची छबी सर्वांनाच भावली. नगर व ग्राम नियोजन खात्याच्या कार्यालयातून जबरीने बाहेर काढण्याचा एखादा प्रकार वगळता सरकारने त्यांना फारशी सापत्नभावाची वागणूक दिली नाही.

आंदोलन तापले असताना मुख्यमंत्री मोबाईलवर त्यांच्याशी चर्चा करू लागले. चर्चा करण्यासाठी शिष्टाचार बाजूला ठेऊन मुख्यमंत्री आझाद मैदानावरही गेले. दिलेले आश्वासन पाळले. त्यानंतर बोरकर यांनी बेमुदत उपोषण मागे घेतले. त्यानंतर खासगी इस्पितळात दाखल झाले. तेथेही त्यांच्या तब्येतीची विचारपूस करण्यासाठी मुख्यमंत्री पोचले. या साऱ्यामुळे राजकीय व सामाजिक जीवनात बोरकर यांचे वजन कमालीचे वाढले.

त्यातच त्यांनी ब्रिटनचा दौरा केला. अनेक जणांना ते तिथे भेटले. एक आमदार असूनही मंत्र्याच्या थाटात तेथे त्यांचे स्वागत झाले. ब्रिटनमधील काही सत्ताधाऱ्यांशी त्यांच्या गाठीभेटी झाल्या. यावरून गोव्याविषयी प्रेम असणाऱ्या विदेशस्थ गोमंतकीयांतही त्यांची एक छबी तयार झाली. यामुळे बोरकर यांच्याविषयी असूया निर्माण होणे साहजिक होते. त्यातूनच आजचा कथित पक्षांतर्गत संघर्ष उभा राहिला, अशी ती राजकीय चर्चा रंगली आहे.