काणकोण: अभ्यास आणि संशोधनकार्य हे विषयाच्या खोलात जाऊन करणे आणि तटस्थपणे आपली बाजू मांडणे, हा लेखकाचा गुण सर्वांनी आत्मसात करणे गरजेचे आहे, असे मत ज्येष्ठ लेखक प्रतापसिंह वेळीप काणकर यांनी व्यक्त केले.

देळे-काणकोण येथील मल्लिकार्जुन आणि चेतन मंजू देसाई महाविद्यालयाच्या कोकणी विभागातर्फे गावडोंगरी येथे ‘आदिवासी जीवन संस्कृती’ कार्यशाळेचे आयोजन करण्यात आले होते. यावेळी उद्‌घाटक व मार्गदर्शक म्हणून ते बोलत होते. महाविद्यालयाच्या माजी विद्यार्थ्यांच्या सहकार्याने या कार्यशाळेचे आयोजन करण्यात आले होते.

दिवसभर चाललेल्या सत्रात सर्जनशील लेखन सराव आणि उमेद याविषयी ज्येष्ठ लेखक कमलाकर म्हाळशी, रामनाथ गावडे, देविदास गावकर, डॉ. पूर्णानंद च्यारी यांनी मार्गदर्शन केले.

सुप्रिया काणकोणकर यांनी सूत्रसंचालन केले. माजी विद्यार्थी संघटनेचे उपाध्यक्ष महेश वेळीप यावेळी उपस्थित होते. हाजीर-गावडोंगरी सरकारी माध्यमिक हायस्कूलचे मुख्याध्यापक दामोदर गावकर यांनी प्रास्ताविक केले. माजी विद्यार्थी संघटनेचे सदस्य यशवंत गावकर यांनी आभार मानले.