Goa Accident Death: प्रवासादरम्‍यान गतिरोधकावर दुचाकी उसळल्‍याने रस्‍त्‍यावर पडून निफा फर्नांडिस (वय 26, रा. रिवण) ही तरुणी गंभीर जखमी झाली. उपचारांसाठी इस्‍पितळात नेत असताना तिचा मृत्‍यू झाला. हा अपघात आज (सोमवार) रात्री आठ वाजण्‍याच्या सुमारास धारबांदोडा येथे झाला.

दुचाकीचालक जॉली फर्नांडिस (२६, रा. उगे) जखमी झाला असून, त्याला उपचारांसाठी इस्पितळात दाखल करण्यात आले. निफा व जॉली हे दोघेही उसगाव येथे कौटुंबिक कार्यक्रमासाठी दुचाकीवरून आले होते. घरी परतताना धारबांदोडा येथे मामलेदार कार्यालयासमोर मुख्य रस्त्यावरील गतिरोधकाचा अंदाज न आल्याने भरधाव दुचाकी उसळली.

नागरिक रास्ता रोको करणार

धारबांदोडा येथे ज्या ठिकाणी अपघात झाला, तेथे आत्तापर्यंत अनेक बळी गेले आहेत. रस्त्यावर उभारण्यात आलेल्या गतिरोधकावर पांढरे पट्टेही नाहीत. त्यामुळे गतिरोधकाचा अंदाज येत नाही. प्रशासनाच्या हलगर्जीपणामुळे नागरिक संतप्त झाले असून, मंगळवारी सकाळी रास्ता रोको करण्याच्या प्रयत्नात आहेत.