पणजी : येत्या मंगळवारी 15 मार्चला राज्यपालांनी विधानसभेचे विशेष अधिवेशन सकाळी 11.30 वाजता बोलावले आहे. नवनिर्वाचित आमदारांना शपथ दिली जाणार आहे. सध्याच्या विधानसभेचा कार्यकाळ 15 मार्चला संपत आहे. त्यापूर्वी हे अधिवेशन घेणे आवश्‍यक आहे. या अधिवेशनासाठी सावर्डेचे आमदार गणेश गावकर यांची हंगामी सभापतीपदी नियुक्ती केली आहे. यासंदर्भातची माहिती राजपालांचे सचिव मिहिर वर्धन यांनी दिली आहे. (Special session of Goa Legislative Assembly on 15th March)

दरम्यान, अधिवेशनाच्या हंगामी सभापतीपदी (Speaker) गणेश गावकर यांची नियुक्ती करण्यात येणार असून त्यांना उद्या सोमवार 14 मार्चला सकाळी 11.30 वाजता राजभवन (Raj Bhavan) येथे शपथ दिली जाणार आहे. या सभापतींसमोर विधानसभेत नवनिर्वाचित आमदार (MLA) शपथ घेणार आहेत. घटनेच्या कलम 188 नुसार ही नियुक्ती करण्यात आली आहे, असे काढण्यात आलेल्या प्रसिद्धीपत्रकात नमूद करण्यात आले आहे.

गेल्या शुक्रवारी मुख्यमंत्री डॉ. प्रमोद सावंत (CM Dr. Pramod Sawant) यांनी मंत्रिमंडळ बैठक घेऊन विधानसभा बरखास्तीचा ठराव घेतला होता व तो राज्यपालांना सादर केला होता. त्यानुसार राज्यपालांनी (Governor) विधानसभा (Legislative Assembly) विसर्जित करून पुढील सरकार स्थापनेपर्यंत मुख्यमंत्री डॉ. सावंत यांना काळजीवाहू सरकारचा पदभार सुपूर्द केला होता.