पणजी: जिल्हा पंचायतीच्या माध्यमातून लोकांची कामे मार्गी लावण्यात येणार आहेत. यामुळे जिल्हा पंचायतीच्या येत्या निवडणुकीत भाजपचेच कार्यकर्ते पुन्हा विजयी होतील असा विश्वास भाजपचे प्रदेशाध्यक्ष सदानंद शेट तानावडे यांनी आज भाजपच्या कार्यालयात झालेल्या गौरव समारंभात व्यक्त केला.

उत्तर गोवा जिल्हा पंचायतीच्या अध्यक्षपदी बिनविरोध निवडून आलेले शंकर चोडणकर आणि दक्षिण गोवा जिल्हा पंचायतीच्या अध्यक्षपदी बिनविरोध निवडून आलेल्या संजना वेळीप यांना तानावडे यांच्या हस्ते पुष्पगुच्छ देऊन गौरविण्यात आले.

यावेळी तानावडे म्हणाले, पक्षाने नव्या चेहऱ्यांना संधी देण्याचा निर्णय घेतला, त्यानुसार या निवडी झाल्या आहेत. त्यांनी उमेदवारी अर्ज सादर केले तेव्हाच या निवडी बिनविरोध होणार हे ठरून गेलेले होते. भाजप हा शिस्तबद्ध पक्ष आहे. पक्षाचा आदेश माझ्यासह सर्व कार्यकर्त्यांसाठी बंधनकारक आहे. भाजप कार्यालयात येण्यापूर्वी दोन्ही नव्या अध्यक्षांनी मुख्यमंत्री डॉ. प्रमोद सावंत यांची सदिच्छा भेट घेतली. यावेळी सत्ताधारी गटातील जिल्हा पंचायत सदस्य उपस्थित होते.

‘नागरिकांच्या हिताच्या कामांना प्राधान्य’

दक्षिण गोवा जिल्हा पंचायतीतील सर्व सदस्यांना विश्र्वासात घेऊनच काम करणार आहे. त्याचप्रमाणे नागरिकांच्या हिताच्या कामांना प्राधान्य देणार आहे, असे दक्षिण गोवा जिल्हा पंचायत अध्यक्षपदाचा ताबा घेतल्यानंतर संजना वेळीप यांनी सांगितले.