मडगाव: जे कंत्राटदार कामे अर्धवट ठेवून पुढील कामे करण्यास विलंब लावतात, त्यांना कारणे दाखवा नोटीस बजावून वेळप्रसंगी त्यांना काळ्या यादीत टाकू, असा इशारा आज बुधवारी दक्षिण गोवा जिल्हा पंचायतीच्या बैठकीत देण्यात आला. दक्षिण गोवा जिल्हा पंचायतीचे अध्यक्ष सिद्धार्थ गावस  देसाई यांच्या अध्यक्षतेखाली ही बैठक झाली.

मुख्याधिकारी विकास कांबळे व उपाध्यक्ष अंजली वेळीप व अन्य जिल्हा पंचायत सदस्य यावेळी उपस्थित होते.  काही कत्रांटदार कामे अर्धवट ठेवून पळ काढतात असा मुद्दा सदस्यांनी उपस्थित केला असता, अध्यक्ष देसाई यांनी त्यांच्यावर कायद्याने कारवाई केली जाईल असे सांगितले. गोवा पंचायत महिला अभियानाच्या अध्यक्षपदी निवड झाल्याबाबत डॉ. गौरी शिरोडकर व अन्य पदाधिकऱ्यांचे  अभिनंदन करण्यात आले. निधी वाढवून दिला असला, तरी तो अजूनही हाती पडला नाही, त्याबाबत पाठपुरावा करू, निधी लवकरच मिळेल असे उत्तर अध्यक्ष देसाई यांनी दिले. 

...सामूहिक शेती!

सामूहिक शेती योजना जिल्हा पंचायतींना द्यावी, अशी मागणीही  यावेळी काही जिल्हा पंचायत सदस्यांतर्फे करण्यात आली. अनुसूचित जमातीसाठी अंत्यसंस्कार  योजना सुरु आहे. अन्य समाजाच्या गरीब घटकांसाठी ही योजना लागू करावी, अशी मागणीही यावेळी करण्यात आली.