सासष्टी: पुढील आठवड्यात जास्तीत जास्त दहा दिवसांत दक्षिण गोवा जिल्हा इस्पितळात ५० परिचरिका, वैद्यकीय अधिकारी, डॉक्टरांची नियुक्ती केली जाईल, अशी माहिती आरोग्य मंत्री विश्र्वजीत राणे यांनी शुक्रवारी इस्पितळाच्या भेटीवेळी पत्रकारांना दिली.

वैद्यकीय अधिकारी, डॉक्टर भरतीसाठी मुलाखती प्रक्रिया सुरू आहे, जशी निवड होते तशी नियुक्ती केली जाईल, असे त्यांनी सांगितले.

फोंडा, कुडचडे, दक्षिण गोवा जिल्हा इस्पितळात ज्या गोष्टींची आवश्यकता आहे त्याची यादी तयार करून सरकारकडे पाठवली आहे. मंजुरी मिळाली की लगेच पूर्तता केली जाईल असेही त्यांनी स्पष्ट केले.

दक्षिण गोवा जिल्हा इस्पितळ सेंटर ऑफ एक्सलन्स करण्याचा शब्द दिला आहे तो पाळणारच. पण जोपर्यंत ओर्थोपेडिक, युरोलोजी सुविधा उपलब्ध होत नाही, आयसीयूची क्षमता वाढत नाही तोपर्यंत आम्हाला वेगळ्या पद्धतीने लक्ष घालावे लागेल असेही राणे यांनी सांगितले.

गरज पडली तर प्रसंगी डॉक्टरांची नियुक्ती कंत्राट पद्धतीने सुद्धा केली जाण्याची शक्यता त्यांनी व्यक्त केली. या सर्व गोष्टीना मंत्रिमंडळाची मंजुरी सुद्धा आवश्यक आहे, असे त्यांनी सांगितले.

गोव्यात १०० ॲम्बुलन्सची गरज आहे. कमीत कमी २५ तरी ॲम्बुलन्सची गरज भागविण्याची शक्यता त्यांनी व्यक्त केली.

पाहणीनंतर आयुश इस्पितळाचे उद्‍घाटन

सार्वजनिक बांधकाम मंत्री तथा मडगावचे आमदार दिगंबर कामत यांनी मोती डोंगर वरील आयुश इस्पितळाची पाहणी करण्यास सांगितले आहे. पुढील काही दिवसांत पाहणी करून आढावा घेतला जाईल. आपणच ही जागा शोधली होती, अशी माहिती त्यांनी दिली.