Peopel Gathering At Khola Panchayt For The Hearing On Eco Sensitive Zone: पश्चिम घाट परिसरात येणाऱ्या पर्यावरण संवेदनशील क्षेत्राचे सर्वेक्षण करण्‍यासाठी सोमवारी खोल येथे आलेल्‍या केंद्रीय तज्‍ज्ञांच्‍या समितीसमोर काणकोण, सांगे व धारबांदोडा या तीन तालुक्‍यांतील 11 पंचायतींनी आपली गावे वगळण्‍याची मागणी केली.
मात्र, ही जनसुनावणी नाही, त्‍यामुळे आम्‍ही तुमची निवेदने स्‍वीकारू शकत नाही, अशी भूमिका या समितीने घेतल्‍याने शेवटी ही निवेदने समाज कल्‍याण मंत्री सुभाष फळदेसाई यांच्‍याकडे सुपूर्द करण्‍यात आली.
पंचायतींनी दिलेली निवेदने मुख्‍यमंत्र्यांसमोर मांडू असे आश्‍‍वासन यावेळी फळदेसाई यांनी पंचसदस्‍यांना दिले. या संवेदनशील क्षेत्रांसंदर्भात खोल येथे जनसुनावणी होणार, असे पंचायतींना सांगण्‍यात आल्‍याने आज मोठ्या प्रमाणावर पंचसदस्‍य आणि स्‍थानिक लोक खोल येथे उपस्‍थित होते.
मात्र, आमची समिती केवळ सर्वेक्षण करण्‍यासाठी आली आहे. जनसुनावणी घेण्‍याचा आम्‍हाला कोणताही अधिकार नाही, असे या समितीचे अध्‍यक्ष संजयकुमार शर्मा यांनी स्‍पष्‍ट केले.
या पंचायतींनी दिली निवेदने
निवेदने देणाऱ्या पंचायतींमध्‍ये खोतीगाव, खोल, नेत्रावळी, रिवण, मोले, सावर्डे, किर्लपाल-दाभाळ, काले, धारबांदोडा, कुळे आणि भाटी या पंचायत सदस्‍यांचा समावेश आहे.
यावेळी या पंचसदस्‍यांची समजूत काढताना हे सर्वेक्षण पर्यावरण संवेदनशील विभाग तयार करण्‍यासाठी नसून केवळ पर्यावरण संवेदनशील क्षेत्र ठरविण्‍यासाठी आहे.
या क्षेत्रामुळे स्‍थानिकांच्‍या अधिकारांवर कुठलेही निर्बंध येणार नाहीत, असेही संजयकुमार शर्मा यांनी स्‍पष्‍ट केले.
"खोल पंचायत पर्यटन क्षेत्र म्‍हणून पुढे येत असून, कित्‍येक युवकांनी या भागात गुंतवणूक केलेली आहे. पर्यावरण संवेदनशील क्षेत्रामुळे त्‍यावर निर्बंध येत असतील तर आम्‍ही ते खपवून घेणार नाही. आमची गावे या क्षेत्रातून वगळावीत, अशी आमची मागणी आहे."
- पंढरी प्रभुदेसाई, खोल पंचसदस्‍य
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.