Snake Found In Jharkhand-Goa Train

वास्को: झारखंडहून गोव्याला येणाऱ्या वास्को-द-गामा साप्ताहिक एक्सप्रेस ट्रेनच्या सेकंड एसी कोचमध्ये साप आढळून आल्याने गोंधळ उडाला. प्रवाशांनी कोचमधून बाहेर पडत मदतीची मागणी केली. याचा व्हिडिओ सध्या सोशल मिडियावर प्रचंड प्रमाणात व्हायरल होत आहे.

सापाला पकडून नंतर सुरक्षितपणे बाहेर काढण्यात आले. ट्रेनमध्ये साप आढळल्याचा व्हिडिओ एका प्रवाशाने शेअर केला आहे. तेव्हापासून हा व्हिडिओ सोशल मीडियावर चर्चेत आहे.

झारखंड-वास्को-द-गामा एक्सप्रेसमध्ये 21 ऑक्टोबर रोजी रेल्वेच्या एसी कोचमध्ये ही घटना घडली. व्हिडिओमध्ये खालच्या बर्थच्या बाजूला पडद्याभोवती साप रेंगाळताना दिसत आहे.

अंकित कुमार सिन्हा यांनी 21 ऑक्टोबर रोजी सोशल मीडिया प्लॅटफॉर्म X वर एक व्हिडिओ शेअर केला आहे.

जसीदीह ते वास्को - द - गामा या ट्रेन क्रमांक - १७३२२ या २१ ऑक्टोबरच्या ट्रेनमध्ये साप आढळून आला. या ट्रेनच्या एसी-२ टीअर (ए२ ३१, ३३) माझे आई वडील प्रवास करत होते. त्यांच्यावतीने मी तक्रार देत आहे. कृपया याची नोंद घेऊन योग्य ती कारवाई करावी, अशी मागणी अंकित कुमार सिन्हा यांनी केलीय.

दरम्यान, कोचमध्ये साप असल्याची तक्रार प्राप्त झाल्यानंतर कर्मचारी तातडीने दाखल झाले. आयआरसीटीसी कर्मचाऱ्यांसह एक व्यक्ती सापाला चादरीत गुंडाळून बाहेर काढताना व्हिडिओमध्ये दिसत आहे.

व्हिडिओ सोशल मीडियावर व्हायरल होताच. रेल्वेकडूनही उत्तर देण्यात आले आहे. तुमची तक्रार स्वीकारण्यात आल्याचे रांची रेल्वे बोर्डाने म्हटले असून, याबाबत संबंधित अधिकाऱ्यांना माहिती देण्यात आल्याचे त्यांनी म्हटले.