वास्को: दाबोळी येथील सहा वर्षे सहा महिने दहा दिवसांच्या विराट शेखर खडपकर याने पायी केदारनाथ गाठत अनोखा विश्वविक्रम केला. ‘इंटरनॅशनल बुक ऑफ रेकॉर्ड्स’ने त्याची ‘यंगेस्ट टू रिच केदारनाथ’ म्हणून अधिकृत नोंद घेत प्रशस्‍तिपत्रक व पदक देऊन गौरव केला.

विराटने ५ मे २०२६ रोजी आई लक्ष्मा खडपकर, गोवा-मुंबईतील कुटुंबीय व मित्रांसोबत सुमारे २२ किलोमीटरचा खडतर प्रवास पूर्ण केला. उणे ६ अंश सेल्सिअस तापमान, पाऊस आणि हिमवृष्टीचा सामना करत त्याने केदारनाथ मंदिर गाठले.

प्रवासादरम्यान डोके व पोटदुखीचा त्रास झाल्याने सुमारे चार तास त्याची प्रकृती बिघडली. मात्र, उपचारानंतर प्रकृती सुधारल्याने हेलिकॉप्टरची गरज भासली नाही. नीलेश साळगावकर व संजय सातार्डेकर यांनी यावेळी मदत केली.

माजी मुरगाव नगराध्यक्ष शेखर खडपकर यांचा पुत्र विराट याने यापूर्वी गोव्यात पाच मॅरेथॉनही पूर्ण केल्या आहेत. त्याच्या या जिद्द, धैर्य आणि चिकाटीचे सर्व स्तरांतून कौतुक होत आहे.