डिचोली : निसर्गाच्या नियमाप्रमाणे पावसाळ्यात रानावनांत वारूळावर उगवणारी ‘अळंबी’ म्हटली, की प्रत्येकाच्या जिभेला पाणी सुटते. रुचकर असलेल्या या अळंब्यांचा वर्षातून एकदा तरी आस्वाद घ्यायला मिळावा, यासाठी खवय्यांचा आटापिटा असतो. पावसाळ्यात वारूळावर उगवणाऱ्या अळंब्यांचे अखेर डिचोलीत दर्शन झाले.

डिचोली-साखळी रस्त्याच्या बाजूने कारापूर-तिस्क परिसरात सोमवारी सायंकाळी मोठ्या प्रमाणात नसली, तरी ‘अळंबी’ विक्रीस उपलब्ध होती. ‘अळंबी’ म्हटल्याबरोबर खवय्यांच्या जिभेला पाणी सुटले आणि खरेदीसाठी झुंबड उडाली. निसर्ग नियमानुसार दरवर्षी साधारण आषाढी एकादशीच्या काळात अळंबी उगवण्याचे दिवस असतात. गेल्याच आठवड्यात आषाढी एकादशी साजरी झाली आहे. गेल्या वर्षी मात्र आषाढी एकादशीला जवळपास आठ दिवस असतानाच, डिचोलीत अळंब्यांचे दर्शन झाले होते.

सोमवारी डिचोली-साखळी रस्त्यावरील कुळण-कारापूर परिसरात ‘अळंबी’ विक्रीस उपलब्ध झाली होती. गेल्या दहा दिवसांपासून पडलेल्या पावसामुळे पोषक वातावरण तयार होऊन अळंबी उगवलेली आहेत. असा जाणकारांनी अंदाज वर्तविला आहे.

महाग असूनही मागणी

सोमवारी सायंकाळी कारापूर-तिस्क परिसरात अळंबी विक्रीस उपलब्ध होती. रस्त्याच्या बाजूने एक विक्रेता अळंबी विकत होता. रस्त्यावरून ये-जा करणारे वाहने थांबवून अळंबी खरेदी करण्यासाठी गर्दी करीत होते. महाग असतानाही अळंब्यांना तेजी आली होती. ६०० रुपये वाटा या दराने विक्री चालू होती. आश्चर्याची बाब म्हणजे प्रत्येक वाट्यात जेमतेम ४० ते ४५ अळंबी होती. मागणी असल्याने या अळंब्यांची हातोहात विक्री झाली.

काहींची निराशा

अळंबी खरेदीसाठी आलेल्या काहीजण निराश होऊन परतावे लागले. सत्तरी तालुक्यातील रानातून ही अळंबी विक्रीस आली होती. गेले दहा दिवस पडलेल्या पावसामुळे त्यातच ऊन पडल्याने अळंबी उगवली, असे संबंधित विक्रेत्याने सांगितले. कडक ऊन पडल्यास पुढील काही दिवसांत मोठ्या प्रमाणात अळंबी बाजारात येण्याची शक्यताही त्यांनी वर्तविली.