Sao Jose de Areal South Goa

सासष्टी तालुक्यातील सां जुझे दी अरीयाल येथे उभारण्यात आलेल्या छत्रपती शिवाजी महाराज यांच्या पुतळ्यावरुन आज शिवजयंती दिवशी मोठा वादंग पाहायला मिळाला.

पुतळा आवश्यक परवानगी न घेता बेकायदेशीपणे उभारण्यात आल्याचा आरोप काही स्थानिकांनी केल्यानंतर आता सां जुझे दी अरीयाल पंचायतीकडून स्टॉप वर्क आदेश जारी करण्यात आले आहेत.

सां जुझे दी अरीयाल पंचायतीने कार्मिला फर्नांडीस यांच्या तक्रार अर्जाचा संदर्भ घेत सरताज माकंदर यांना ही स्टॉप वर्क ऑर्डर पाठवली आहे.

सां जुझे दी अरीयाल पंचायत क्षेत्रातील सर्व्हे नंबर 229/2 मध्ये गोवा पंचायत राज कायदा 1994 अंतर्गत बेकायदेशीर काम सुरु केले आहे. संबधित आस्थापनांकडून परवानगी न घेता काम केल्याचे पंचायतीन आदेशात म्हटले आहे.

दरम्यान, तात्काळ हे काम थांबवून आवश्यक परवाने आणि कागदपत्रांसह पडताळणीसाठी हजर राहावे असे आदेश पंचायतीने जारी केले आहेत. हजर न राहिल्यास योग्य ती कारवाई केली जाईल, असे सरपंच लिंडा फर्नांडीस यांनी जारी केलेल्या या आदेशात म्हटले आहे.