मडगाव: आगामी विधानसभा निवडणुकीच्या पार्श्वभूमीवर गोव्यात विरोधकांची महाआघाडी उभारण्याच्या हालचालींना वेग आला आहे. या आघाडीत राष्ट्रवादी काँग्रेसचा (शरद पवार गट) सहभाग असण्याचे संकेत प्रदेशाध्यक्ष जुझे फिलिप डिसोझा यांनी दिले.

विश्रांतीसाठी गोव्यात आलेले राष्ट्रवादी काँग्रेसचे अध्यक्ष शरद पवार यांची डिसोझा यांनी आज कासावली येथील ग्रँड हयात हॉटेलमध्ये भेट घेतली. या भेटीत सुमारे पाऊण तास चर्चा झाली. राष्ट्रीय पातळीवर जागावाटप आणि आघाडीबाबत चर्चा सुरू आहे. पक्षाच्या नेत्या सुप्रिया सुळे या दिल्लीत काँग्रेस नेते राहुल गांधी यांच्या संपर्कात असल्याची माहिती शरद पवार यांनी दिल्याचे डिसोझा यांनी सांगितले.

राष्‍ट्रवादी काँग्रेसला मिळणार यश

गोव्यात भाजपचा पराभव करण्यासाठी सर्व विरोधकांनी एकत्र येण्याची गरज असल्याचे पवार यांचेही मत आहे. आगामी निवडणुकीत राष्ट्रवादी काँग्रेसला गोव्यात सन्मानजनक जागा मिळतील, असा विश्वासही पवार यांनी व्यक्त केल्याचा दावा डिसोझा यांनी केला.