Shapur Bandora Slum Encroachment

मडकई: शापूर-बांदोडा, फोंडा येथील अनधिकृतपणे उभारलेल्या ३१ झोपड्या पाडण्यासाठी मंगळवारी (ता.४) सकाळी कारवाई सुरू झाल्यानंतर या ठिकाणी तणावाचे वातावरण निर्माण झाले. हे प्रकरण गेली अनेक वर्षे न्यायप्रविष्ट होते. मात्र, न्यायालयाने या झोपड्या पाडण्याचा आदेश दिल्यानंतर संबंधित जागेचा मालक, वकील जेसीबी यंत्रासह आल्यानंतर या ठिकाणी गोंधळ उडाला.

शेवटी ही कारवाई पंधरा दिवसांपर्यंत स्थगित ठेवण्याच्या विनंतीला संबंधित जमीनमालकाने होकार दिल्यामुळे तणाव निवळला; पण पंधरा दिवसांनंतर या झोपड्या पाडण्यात येणार आहेत.

फोंड्याला अगदी जवळ असलेल्या शापूर-बांदोडा भागात गेली अनेक वर्षे झोपड्या उभारून काही मजूर लोक राहतात. मात्र, ही जमीन काझी नामक इसमाची असून गेली अनेक वर्षे या झोपड्या हटवण्यासाठी काझीने न्यायालयात याचिका दाखल केली होती.

या याचिकेला अनुसरून न्यायालयाने या झोपड्या पाडण्यासाठी अनुमती दर्शवल्याने त्या पाडण्यासाठी कारवाई करण्यास आलेल्या संबंधित जमीन मालकाला या झोपडपट्टीवाल्यांना इतरत्र स्थलांतर होण्यासाठी पंधरा दिवस देण्याची विनंती केली. स्‍थानिक सरपंच रामचंद्र नाईक, माजी सरपंच राजेश नाईक व इतरांनी विनंती केली. त्याला अनुसरून ही मागणी मान्य केली आहे.

स्थलांतर करण्यास वेळ देणे गरजेचे!

सरपंच रामचंद्र नाईक यांनी सांगितले की, या ठिकाणी राहणाऱ्या मुसलमान बांधवांचा ईद सण जवळ आला आहे, त्यामुळे या लोकांना इतरत्र स्थलांतर होण्यासाठी वेळ देणे आवश्‍यक होते, म्हणून मानवतेच्या दृष्टिकोनातून संबंधितांकडे मागणी केली.

माजी सरपंच राजेश नाईक यांनी सांगितले की, गेली चाळीस ते पन्नास वर्षे हे लोक इथे राहतात. मात्र, प्रकरण न्यायप्रविष्ट होते. या लोकांचे इतरत्र स्थलांतर होण्यासाठी थोडा अवधी देणे आवश्‍यक आहे.