Vasco News : वास्को, शांतीनगर येथे रेल्वे दुपदरीकरणाच्या कामाच्या परिसरातील लोकवस्ती असलेल्या जागेची वास्कोचे आमदार कृष्णा साळकर यांनी पाहणी करून रेल्वे अधिकाऱ्यांना आवश्‍यक त्या सूचना केल्या.

रेल्वे दुपदरीकरणाचे काम चालू असून येथील घरांना तडा जाणार नाही, याची ग्वाही रेल्वे अधिकाऱ्यांनी दिल्याचे साळकर यांनी सांगितले.

दाबोळी ते वास्को रेल्वे स्थानकापर्यंत रेल्वे दुपदरीकरणाचे काम युद्ध पातळीवर सुरू असून वास्को मतदार संघातील शांतीनगर येथे रेलमार्गाकडे शेकडो घरांचा प्रश्न उपस्थित झाला होता. रेल मार्गावरील भागात दुतर्फा शेकडो घरे असून डोंगराळ भागातून हा रेलमार्ग वास्को रेल्वे स्थानकाकडे जात आहे.

दरम्यान रेल्वे दुपदरीकरण कामामुळे येथील घरांवर गंडांतर आले होते. मात्र याविषयी वास्कोचे आमदार कृष्णा साळकर यांनी रेल्वे अधिकाऱ्यांची संयुक्त बैठक घेऊन यावर विचारविनिमय करून या घरांना दिलासा दिला. त्यानुसार आमदार साळकर या कामाचा वारंवार आढावा घेत आहेत.

दरम्यान, आज आमदार साळकर यांनी शांतीनगर येथे रेल्वे दुपदरीकरण कामाच्या ठिकाणी भेट देऊन कामाचा आढावा घेतला. यावेळी त्यांच्यासमवेत स्थानिक नगरसेविका श्रध्दा महाले, नगराध्यक्ष गिरीष बोरकर, रेल्वे अधिकारी व नागरिक उपस्थित होते.

रेल्वे अधिकाऱ्यांना आमदार साळकर यांनी योग्य त्या सूचना केल्या व कामाच्या वेळी घरांना तडा जाणार नाही याची योग्य ती काळजी घ्यावी, असे सुचविले.

याठिकाणी शेकडो घरे असून यापैकी फक्त तीन घरे पाडण्यात आली व त्यांना इतर ठिकाणी स्थलांतरित करण्याची जबाबदारी आम्ही घेतली आहे,असे आमदार कृष्णा साळकर म्हणाले.