Margao : म्हादई प्रश्नावर गोव्याच्या मुख्यमंत्र्यांना विश्वासात घेऊन तोडगा काढला, असे वक्तव्य केंद्रीय गृहमंत्री अमित शहा यांनी बेळगाव येथील सभेत केले होते. त्यावर गोव्यातील एकही ज्येष्ठ भाजप नेता अजून बोलला नसला तरी हे वक्तव्य फक्त राजकीय स्वरूपाचे होते, अशी प्रतिक्रिया आज भाजयुमोचे दक्षिण गोवा अध्यक्ष शुभम नार्वेकर यांनी व्यक्त केली.

म्हादई प्रश्नावर गोवा फॉरवर्ड पक्षाचे नेते मुख्यमंत्री डॉ. प्रमोद सावंत यांना टार्गेट करतात. त्याला उत्तर देण्यासाठी आज मडगावात भाजयुमोची पत्रकार परिषद झाली. यावेळी भाजयुमोचे राज्य कार्यकारिणी सचिव रघुवीर शिरोडकर आणि दक्षिण गोवा कार्यकारिणी उपाध्यक्ष आशिष फळदेसाई उपस्थित होते.

दक्षिण गोवा जिल्हा इस्पितळाच्या खासगीकरणाबद्दल विचारले असता, प्रमोद सावंत यांचे हे सरकार सामान्य लोकांचे हित राखणारे आहे. त्यामुळे या इस्पितळाचे कोणत्याही परिस्थितीत खासगीकरण होणार नाही, असा विश्वास त्यांनी व्यक्त केला.

गोवा फॉरवर्ड हा पक्ष राजकीय अस्तित्व गमावून बसला असून या पक्षाला जनाधार नसल्याने त्यांच्या आमदारांची संख्या तीनवरून एकावर आली. राजकीय अस्तित्वासाठीच ते मुख्यमंत्र्यांवर टीका करत आहेत. ही टीका सुरूच राहिल्यास भाजयुमोचे कार्यकर्ते पक्षाच्या नेत्यांना राज्यात फिरणेही मुश्किल करतील.

- शुभम नार्वेकर, अध्यक्ष, भाजयुमो, द. गोवा.