गेल्या काही दिवसांपुर्वी साळ नदी प्रदुषणावरुन राज्यातील दोन बड्या नेत्यांमध्ये झालेली खडाजंगी संपुर्ण राज्याने पाहिली. या पार्श्वभूमीवर आता पार नदीमध्ये मैलामिश्रीत पाणी सोडल्याचा धक्कादायक प्रकार समोर आला आहे.

(Sewage water released into Par river at Assonora)

मिळालेल्या माहितीनुसार अस्नोडा येथील पार नदीमध्ये मैलामिश्रीत पाणी सोडल्याचा धक्कादायक प्रकार समोर आला आहे. यामुळे नागरीकांचे आरोग्य धोक्यात आल्यास याला जबाबदार कोण ? हा प्रश्न अनुत्तरीतच आहे. याहून गंभीर प्रकार म्हणजे नदीत सोडलेले मैलामिश्रीत पाणी फिल्टर करून घरगुती वापरासाठी पाठवले जात असल्याचे समोर आले आहे. मात्र हे पाणी नेमके कोणत्या प्रकल्पातून फिल्टर केले गेले आहे. हे अद्याप स्पष्ट झालेले नाही.

मैलामिश्रीत पाणी हे वृक्ष लागवड अथवा गार्डनसाठी वापरणे अपेक्षित असताना हे पाणी घरगुती वापरासाठी पुरवले गेल्याने हा विषय आता नागरीकांमध्ये चांगलाच रंगला आहे. नागरीकांनी याबाबत आवाज उठवणार असल्याचे म्हटले आहे. यापुढे पार नदीमध्ये मैलामिश्रीत पाणी सोडले जात असल्याचा प्रकार थांबवण्यात आला नसल्यास नागरीकांना वेगळी भुमिका घ्यावी लागेल असेही अस्नोडा येथील काही नागरिकांनी म्हटले आहे.