Goa Accident News: पर्वरी येथील राष्ट्रीय महामार्गावर खासगी बस व इनोव्हा या टुरिस्ट टॅक्सीमध्ये समोरासमोर टक्कर झाली. परिणामी, या अपघातामुळे म्हापसा व पणजी या दोन्ही बाजूने वाहनांच्या रांगा लागल्या. नंतर क्रेनच्या साहाय्याने अपघातग्रस्त वाहने बाजूला करेपर्यंत मोठ्या प्रमाणात वाहतूक कोंडी झाली.

दरम्यान, अपघातात बसमधील चार प्रवासी हे किरकोळ जखमी झाले. सुदैवाने कुठलीही जीवितहानी झाली नाही. शुक्रवारी (ता.२२) दुपारी ३.३० वा.च्या सुमारास हा अपघात पर्वरी-तिस्क येथे चॅपेलसमोर घडला.

प्राप्त माहितीनुसार, राजू ट्रॅव्हल्स (जीए ०४ टी ५९३१) ही पणजी-वाळपई बस म्हापशाच्या दिशेने सुसाट जात होती. तर, इनोव्हा (जीए ०३ एन ८०१०) ही टॅक्सी मोपाहून पणजीच्या दिशेने जात असताना या दोन्ही वाहनांची समोरासमोर धडक बसल्याने हा अपघात झाला.

बसचालकाने योग्य लेन न पाळल्याने त्याने इनोव्हा कारला धडक दिली. यात इनोव्हाच्या दर्शनी भाग चक्काचूर झाला. तर बसच्या वाहकच्या दर्शनी बाजूने गाडीचे नुकसान झाले. सुदैवाने यात कुठलीही जीवितहानी झाली नाही.

पाचजण किरकोळ जखमी

बसमध्ये चार प्रवासी व टॅक्सीमधील मुंबईचा पर्यटक असे मिळून एकूण पाचजण किरकोळ जखमी झाले. त्यांच्यावर गोमेकॉत उपचार करून नंतर सर्वांना घरी सोडण्यात केले. बसचालक नासेर हुसेन (३३, भुईपाल-वाळपई) याने बेदरकारपणे गाडी चालवल्याप्रकरणी पर्वरी पोलिसांनी संशयिताविरुद्ध गुन्हा दाखल केला. पोलिस प्रीतम दाभोलकर पुढील तपास करत आहेत.