Savitribai Phule Jayanti 2024 :

फोंडा सावित्रीबाई फुले या महिला शिक्षणाच्या प्रणेत्या असल्यामुळे त्यांची जयंती सरकारी पातळीवर साजरी होणे आवश्यक आहे, असे प्रतिपादन निवृत्त प्राचार्य तथा ज्येष्ठ साहित्यिक मिलिंद म्हाडगुत यांनी सावित्रीबाई फुले प्रतिष्ठान आयोजित सावित्रीबाईंच्या १२७ व्या पुण्यतिथी कार्यक्रमात बोलताना केले.

यावेळी सावित्रीबाई फुले प्रतिष्ठानचे संस्थापक मधु नाईक, डॉ.फातिमा मुल्ला, समीरा शेख, सोनाली कांबळी, विवेकानंद वेरेकर, गीता शिरसाट आदी मान्यवर उपस्थित होते. सध्या देशात महिला शक्तीचा जय घोष सुरू असल्यामुळे ही शक्ती जागृत करणाऱ्या देशाच्या पहिल्या महिला शिक्षिका सावित्रीबाईंना सरकारी पातळीवर स्थान देणे अनिवार्य असल्याचे म्हाडगुत यांनी सांगितले.

याबाबतीत मुख्यमंत्र्यांना निवेदन देण्यात येईल, असे त्यांनी सांगितले. यावेळी बोलताना फातिमा मुल्ला यांनी सांगितले,की शिक्षणाला वयाचे बंधन नसून महिलांनी वयाचा बाऊ न करता विविध प्रकारचे शिक्षण घ्यावे. सावित्रीबाई या महिलांच्या आदर्श आहेत, असे त्या म्हणाल्या.

मधू नाईक यांनी प्रास्तविकात आता राज्याच्या बाराही तालुक्यात सावित्रीबाई फुले प्रतिष्ठानच्या समित्या नेमल्या जातील,असे जाहीर केले. विवेकानंद वेरेकर, सोनाली कांबळी, वृषाली बेतकीकर यांचीही समयोचित भाषणे झाली.

सुरुवातीला मान्यवरांच्या हस्ते सावित्रीबाईंच्या प्रतिमेला पुष्पहार अर्पण करून सावित्रीबाईच्या स्मृतीना अभिवादन करण्यात आले. सूत्रसंचालन समीरा शेख यांनी केले. गीता शिरसाट यांनी आभार मानले.