साखळी: गोव्यातील होळी आणि रंगोत्सव हा अनोखा व उत्साहपूर्ण असतो. सर्व वयोगटातील नागरिक मोठ्या आनंदाने यात सहभागी होतात. सार्वजनिक रंगोत्सवांमध्ये महिलांचा वाढता सहभाग पाहता त्यांचा आदर व सन्मान राखावा, तसेच या रंगोत्सवाच्या निमित्ताने इतरांच्या आयुष्यातही आनंदाचे रंग भरावेत, असे आवाहन मुख्यमंत्री डॉ. प्रमोद सावंत यांनी केले.

रवींद्र भवन, साखळीतर्फे सलग दुसऱ्या वर्षी भव्य रंगोत्सवाचे आयोजन करण्यात आले होते. सकाळी ९ वा. सुरू झालेल्या या सोहळ्यात नागरिकांनी मोठ्या संख्येने उपस्थिती लावली.

यावर्षीच्या रंगोत्सवात खास डिजे संगीत, रेन डान्स, लहान मुलांसाठी कृत्रिम जलतरण तलाव आणि विविध दालनांची आकर्षक मांडणी करण्यात आली होती. केतकी पोरोब यांच्या मार्गदर्शनाखाली मुले व उपस्थितांसाठी विविध स्पॉट गेम्स घेण्यात आले. या उपक्रमांचा नागरिकांनी आनंद लुटला.

यावेळी रवींद्र भवनचे उपाध्यक्ष दत्ताराम चिमुलकर, संचालक अमोल बेतकीकर, रविराज च्यारी, नगराध्यक्षा सिध्दी प्रभू आदी मान्यवर उपस्थित होते. रंग, आनंद आणि सामाजिक संदेश यांचा सुंदर संगम साधत साखळीतील रंगोत्सव जल्लोषात पार पडला.

मुलांसमवेत लुटला आनंद

सुमारे ११ वा. मुख्यमंत्री डॉ. प्रमोद सावंत व पद्मिनी फाऊंडेशनच्या अध्यक्षा सुलक्षणा सावंत यांनी रंगोत्सवस्थळी उपस्थिती लावली. आगमन होताच उपस्थितांनी त्यांना रंग लावून होळीच्या शुभेच्छा दिल्या. मुख्यमंत्र्यांनीही नागरिकांना शुभेच्छा देत उत्सवात सहभाग घेतला. रेन डान्समध्ये नागरिकांसोबत ठेका धरल्यानंतर त्यांनी लहान मुलांच्या जलतरण तलावात जाऊन बालकांसमवेत आनंद लुटला.