Fatorda Illegal Casinos: फाताेर्ड्यातील कॅसिनोंना सत्ताधाऱ्यांचं 'अभय'! आमदार सरदेसाईंचा घणाघात; कायदा-सुव्यवस्था धोक्यात

मडगाव: फातोर्डा मतदारसंघात काही ठिकाणी मिनी कॅसिनो व जुगारअड्डे सुरू असून त्यांना राजकीय आश्रय असल्याचा आरोप आमदार विजय सरदेसाई यांनी केला. या बेकायदेशीर प्रकारांवर त्वरित कारवाई करून ते बंद करावेत, अशी मागणी त्यांनी मुख्यमंत्र्यांकडे केली आहे. सरदेसाई यांनी सांगितले की, विराज वाडेकर यांनीही यासंदर्भात पोलिसांत तक्रार केली होती. मात्र तक्रारीनंतरही कारवाई न होता उलट धमक्या मिळाल्याचे समोर आले आहे. या कॅसिनो आणि जुगारामुळे युवकांवर वाईट परिणाम होत

असून त्यांचे भवितव्य धोक्यात येत आहे. यासोबतच फातोर्ड्यात रात्रीच्या वेळी काही समाजकंटकांकडून दादागिरी, चोरीच्या दुचाक्यांचा वापर अशा प्रकारांमुळे कायदा-सुव्यवस्था ढासळत असल्याचे त्यांनी नमूद केले. फातोर्डा पोलिस स्थानकावर कायमस्वरूपी पोलिस निरीक्षक नेमण्याची गरज असल्याचे सांगत, सध्या हा ताबा सांगे येथील निरीक्षकाकडे असल्याची माहिती सरदेसाई यांनी दिली. या सर्व बाबींबाबत आपण मुख्यमंत्र्यांशी चर्चा करणार असल्याचे त्‍यांनी स्पष्ट केले.