Goa Parasailing Accident Video: गळ्याभोवती दोरी आवळली, श्वास कोंडला, मृत्यू समोर दिसला! गोव्यातील पॅरासेलिंगचा जीवघेणा थरार व्हायरल; महिलेनं सांगितली आपबिती

Goa Parasailing Accident Video: पर्यटनासाठी प्रसिद्ध असलेल्या गोव्यात एका महिलेला पॅरासेलिंग करताना अत्यंत भयानक अनुभवाचा सामना करावा लागला. सुष्मिता नावाच्या एका महिलेने तिच्या इंस्टाग्रामवर या घटनेचा व्हिडिओ शेअर केला असून हा आनंददायी अनुभव तिच्यासाठी मृत्यूचा सापळा कसा ठरला असता याविषयी सांगितले. सुष्मिताच्या या पोस्टला आतापर्यंत 2.3 दशलक्षाहून अधिक व्ह्यूज मिळाले असून पर्यटकांच्या सुरक्षेचा प्रश्न पुन्हा एकदा ऐरणीवर आला.

सुष्मिताने इंस्टाग्रामवर शेअर केलेल्या कॅप्शनमध्ये म्हटले की, "गोव्यात मजेसाठी सुरु झालेला पॅरासेलिंगचा अनुभव थेट समुद्राच्या मध्यभागी संघर्षात बदलला. मी पाण्यात पडले, दोरी माझ्या गळ्याभोवती आवळली गेली आणि त्या क्षणी केवळ भीती आणि शांतता होती. जेव्हा तुम्हाला जाणीव होते की आता परिस्थिती तुमच्या नियंत्रणात नाही, ती भावना कोणताही कॅमेरा टिपू शकत नाही." सुष्मिताने पुढे नमूद केले की, ती सुदैवी होती म्हणून कोणीतरी मदतीला आले आणि तिचा जीव वाचला. प्रत्येक व्यक्तीला आयुष्यात अशी दुसरी संधी मिळतेच असे नाही, असा इशाराही तिने दिला.

या घटनेनंतर सुष्मिताने इतर पर्यटकांना (Tourists) सतर्क राहण्याचे आवाहन केले. कोणत्याही वॉटर स्पोर्टला सुरुवात करण्यापूर्वी सुरक्षा यंत्रणेची नीट तपासणी करा, प्रश्न विचारा आणि स्वतःवर विश्वास ठेवा, कारण काही अनुभव केवळ आठवणी राहत नाहीत, तर ते आयुष्यभरासाठी एक मानसिक धक्का देतात, असे तिने आपल्या पोस्टमध्ये म्हटले.

या व्हिडिओवर सोशल मीडिया (Social Media) वापरकर्त्यांनी संतप्त प्रतिक्रिया दिल्या आहेत. व्हिडिओमध्ये बॅग्राऊंडला ऐकू येणाऱ्या हसण्याच्या आवाजावर एका युजरने आक्षेप घेत म्हटले की, "कोणाच्या तरी जिवाशी खेळ सुरु असताना असा हसण्याचा आवाज येणे हे लोकांच्या असंवेदनशीलतेचे लक्षण आहे." दुसऱ्या एका युजरने भारतात अशा प्रकारचे साहसी खेळ पूर्ण सुरक्षेशिवाय आयोजित करण्यावर बंदी घालण्याची मागणी केली. पॅरासेलिंगमध्ये अशा प्रकारे पाण्यात बुडवणे अत्यंत धोकादायक असल्याचेही काहींनी नमूद केले. काही नेटकऱ्यांनी सुष्मिताच्या धाडसाचे कौतुक केले असून जनजागृती केल्याबद्दल तिचे आभार मानले आहेत.