Sankhali Municipal Council Election 2023 : साखळी पालिकेच्या निवडणुकीसाठी अर्ज भरण्याच्या दुसऱ्या दिवशीही एकही अर्ज दाखल झालेला नाही. या निवडणुकीत उतरणारा भाजप पॅनल व ‘टुगेदर फॉर साखळी’ या दोन्ही गटांकडून बहुतेक प्रभागांमधील उमेदवार निश्चित झालेले आहेत. तरीही काही प्रभागांमध्ये एकापेक्षा अधिक उमेदवार असल्याने वाटाघाटी सुरू आहेत.

या दोन्ही गटांतर्फे येत्या दोन दिवसांत उमेदवार जाहीर करण्यात येण्याची शक्यता आहे. त्यामुळे गुरूवारी किंवा नंतरच्या दिवसांमध्ये हे उमेदवार आपापले उमेदवारी अर्ज सादर करतील.

साखळीचे आमदार तथा मुख्यमंत्री डॉ. प्रमोद सावंत यांच्या नेतृत्वाखाली या निवडणुकीत उतरणाऱ्या उमेदवारांची यादी जवळपास निश्चित झालेली आहे.

सर्व प्रभागांमधील उमेदवारांमध्ये समेट घडविण्यात आलेली आहे. त्यामुळे सर्व मतभेद बाजूला ठेवून आपल्या उमेदवाराला विजयी करण्यासाठी संघटित कार्य करण्याचे सर्वांनी ठरविले आहे.

ज्या प्रभागांमध्ये उमेदवारांमध्ये धुसफूस चालू आहे, तेथेही आमचे कार्यकर्ते विरोधात जाणार नाहीत, तर आमच्याच उमेदवाराला विजयी करण्यासाठी वावरतील, असा विश्वास नगरसेवक दयानंद बोर्येकर व आनंद काणेकर यांनी व्यक्त केला.

‘टुगेदर फॉर साखळी’ची व्यूहरचना

गेले दोन कार्यकाळ साखळी नगरपालिकेवर असलेली आपली सत्ता अबाधित राखण्यासाठी सत्ताधारी ‘टुगेदर फॉर साखळी’ या गटाने कंबर कसली आहे.

सर्व प्रभागांमध्ये नियोजनबद्ध व्यूहरचना आखण्‍यात हा गट करण्यात मग्न आहे. त्‍यांच्‍या एकापाठोपाठ एक बैठका सुरू आहेत.

प्रभाग फेररचना व आरक्षणामुळे या गटासमोर आव्हान उभे असले तरी कोणी कोणत्या प्रभागात निवडणूक लढवावी, तसेच कोणी कोणासाठी काम करायचे याबाबत चर्चा सुरू आहे.

या गटाचेही अर्धेअधिक उमेदवार निश्चित झालेले असून काही ठिकाणी उमेदवारांसाठी चाचपणी सुरू आहे. लवकरच त्याही प्रभागांमधील उमेदवार निश्चित करण्‍यात येतील, असे नगराध्यक्ष राजेश सावळ व प्रवीण ब्लेगन यांनी सांगितले.