मुरगावचे आमदार संकल्प आमोणकर यांनी 'परीक्षा पे चर्चा' या उपक्रमात हजेरी लावली आणि त्यात भाग घेतला. परीक्षा पे चर्चा या कार्यक्रमात पंतप्रधान नरेंद्र मोदी विद्यार्थी आणि शिक्षकांशी संवाद साधतात आणि विद्यार्थ्यांना परीक्षेचा ताण सोडून सर्वोत्तम कामगिरी करण्यास प्रेरित करतात.

संकल्प आमोणकर यांनी मुख्याध्यापक तुलसीदास देसाई आणि विद्यार्थी यांच्यासमवेत सडा येथील मुरगाव हायस्कूलमध्ये या संवाद सत्रात सहभागी होऊन विद्यार्थ्यांचा उत्साह वाढवला.

शुक्रवारी पंतप्रधान नरेंद्र मोदी दिल्लीतील तालकटोरा स्टेडियमवरून 'परीक्षा पे चर्चा'च्या यंदाच्या संवाद कार्यक्रमात विद्यार्थी, शिक्षक आणि पालकांशी संवाद साधत आहेत. ज्याचे राज्यभरातील 5464 सरकारी, निमसरकारी आणि खाजगी शाळांमध्ये थेट प्रक्षेपण करण्यात येत आहे. यामध्ये 10 लाखांहून अधिक विद्यार्थी सहभागी होत आहेत.

दरम्यान, या कार्यक्रमात विद्यार्थी त्यांच्या मनातील अनेक प्रश्न मोदींना विचारत आहेत. या प्रश्नांना उत्तर देताना पंतप्रधान मोदी म्हणाले की, पालकांना आपल्या मुलांकडून अपेक्षा असणे स्वाभाविक आहे, त्यात गैर काहीच नाही. मात्र जर कौटुंबिक अपेक्षा सामाजिक स्थितीमुळे असतील तर ते चुकीचे आहे.

याबाबत त्यांनी मुलांसोबतच पालकांनाही काही गोष्टी सांगितल्या. मुलांवर अपेक्षांचे ओझे न टाकण्याचे आवाहन त्यांनी यावेळी सर्व पालकांना केले.