Sanjivani Factory Theft Case: संजिवनी साखर कारखान्याच्या पे-पार्किंगमधील अवजड वाहनांमधून मोबाईल व रोकड चोरट्याने लंपास केल्याची घटना घडली. याप्रकरणी शेजारील राज्यातील आलेल्या ट्रक मालकांनी फोंडा पोलिसांत तक्रार नोंद केली आहे.

चोरट्यांनी 8 मोबाईल व 40 ते 50 हजार रुपयांची रोकड पार्क केलेल्या आठ अवजड वाहनांमधून लंपास केली.

याबाबत अधिक माहिती अशी की, धारबांदोडा येथील संजीवनी साखर कारखान्याच्या ‘पे पार्किंग’मध्ये ठेवण्यात आलेल्या ट्र्कच्या काचा काढून मोबाईलसह 40 ते 50 हजार रुपये लंपास केले.

ट्रकमध्ये झोपलेल्या चालक, वाहकांवर स्प्रे मारून बेशुद्ध करून 8 मोबाईल व सर्व गाड्यातील मिळून 40 ते 50 हजार रुपये रोख रक्कम अज्ञातांनी पळून नेले. गेले दोन दिवस सतत अशा घटना घडत आहे.

गोव्यात अशा स्वरुपाचे ट्रक टर्मिनल पार्किंग हब नसल्याने फोंडा ट्रक असोसिएशनचे सचिव नागराजन नायडू यांनी नाराजी व्यक्त केली. ते म्हणाले, गोवा सरकारने याची दखल घ्यावी आणि लवकर ट्रक टर्मिनल पार्किंग हब उभारावा.

संजीवनीचे प्रशासक सत्तेज कामत म्हणाले, "आम्ही जेव्हा त्यांच्याकडून पे पार्किंगसाठी पैसे आकारतो आणि त्यांना पावती देतो, त्या पावतीमध्ये स्पष्ट लिहिलेले आहे, की चोरी वगैरे झाल्यास आम्ही जबाबदारी घेणार नाही."

"कारखान्याच्या या जागेत अशा स्वरूपाची चोरी झाली असल्याने आत्ता या पुढे अशा प्रकारची स्वरूपाची चोरी होऊ नये, यासाठी आम्ही त्या ठिकाणी सिसिटिव्ही कॅमेरा बसविणार आहोत. पेट्रोल पंप जवळच असून रात्रपाळीत आमचे कामगार त्या पे पार्किंगच्या जागेवर राऊंड मारीत असतात. पोलिसांनी सुद्धा या ठिकाणी रात्रीचा राऊंड मारला पाहिजे."