कुर्टी-खांडेपार पंचायतीच्या सरपंचपदी संजना सुदेश नाईक यांची बिनविरोध निवड करण्यात आली आहे. कुर्टी-खांडेपारचे सरपंच नावेद तहसीलदार यांच्याविरोधात सहा पंचसदस्यांनी अविश्वास ठराव दाखल केला होता.

सरपंचांकडून पंचांना विश्वासात घेतले जात नसल्याचा आरोप ठराव आणलेल्‍या पंचांनी केला होता. कुर्टी पंचायत कार्यालयात बोलावलेल्या बैठकीला अविश्वास ठराव आणलेले उपसरपंच विल्मा परेरा, पंचसदस्य हरेश नाईक, मनीष नाईक, अभिजीत गावडे, संजना नाईक व साजिदा सय्यद यांची उपस्थिती होती.

तर, विरोधातील भिका केरकर व नीळकंठ नाईक हे दोनच पंचसदस्य हजर होते. त्यातील भिका केरकर यांनी अविश्वास ठराव आणलेल्या विल्मा परेरा गटाला समर्थन दिले तर नीळकंठ नाईक विरोधात राहिले. त्यामुळे या अविश्वास ठरावाचे चित्र 7 विरुद्ध 4 असे दिसून आले होते. ही पंचायत मगो व काँग्रेस समर्थक गटाची होती. आता ती भाजप गटाची झाली आहे.