सांगे: चातकासारखी प्रतीक्षा करणाऱ्या गोमंतकीय पर्यटकाचे आकर्षण असलेले साळावली धरण तुडुंब भरलेले असून संध्याकाळी ते ‘ओव्हर फ्लो’ झाले. त्यामुळे जलाशयातून पाणी वाहू लागले. धरणातून पाण्याचा होणारा विसर्गाचे हे नयनरम्य दृश्‍य पाहण्यासाठी स्थानिकासह, सांगे पर्यटकांनीही गर्दी केली.

संध्याकाळी धरणाच्या वरील भागात पावसाचा जोर वाढल्याने संध्याकाळी ५. ३० वा. भरून वाहू लागल्याची अधिकृत माहिती जल संपदा खात्याचे अधिकारी स्वप्नील दिवकर यांनी दिली. थील विहंगम दृश्याचा नयनरम्य नजराणा पाहण्यासाठी आता लहान थोरांची पावले साळावलीच्या वाटेकडे मोठ्या प्रमाणात वळणार आहेत. परिणामी सांगे बाजारात पावसाळी पर्यटन फुलल्याचे चित्र पहायला मिळणार आहे.

वास्तविक साळावलीचे जलाशय जुलै महिन्याच्या दुसऱ्या आठवड्यात किंवा पाऊस लांबला तर तिसऱ्या आठवड्यात सुद्धा जलाशय भरून वाहते. पण प्रथमच जून महिन्यात जलाशय तुडुंब भरला आहे.

मे महिन्यात पडलेला पाऊस आणि आता पडत असलेला पाऊस जमा केल्यास धरणात एकेचाळीस मीटर उंचीचे पाणी साचले आहे. पाण्याचा साठा पाहता जुलै महिन्यात पाण्याची उंची अधिक वाढण्याची शक्यता आहे. साळावली धरणात कितीही पाणी भरले, तरी जादा पाणी नदीत वाहून जात असते.

सायंकाळी ‘ओव्हर फ्लो’

आजपर्यंत १२२५ मि. मी. पाऊस पडल्याची नोंद झाली आहे. लोकांच्या म्हणण्यानुसार यंदा पावसाने जोर पकडला नसला तरी धरणाच्या वरील भागात पडणारा पाऊस मोठ्या प्रमाणात असल्यामुळे पाणी साठ्यात वाढ झाली. बुधवारी संध्याकाळी धरण ‘ओव्हर फ्लो’ झाले. उद्यापासून या परिसरात पर्यटकांचा ओघ वाढणार आहे.