मडगाव: सांगे तालुक्यातील कोटार्ली परिसरात बुलेट मोटारसायकल आणि स्कूटर यांच्यात झालेल्या अपघातात दोन्ही वाहनचालक तसेच दुचाकीवर असलेली आणखी एक व्यक्ती जखमी झाल्याची घटना घडली. या प्रकरणी सांगे पोलिसांनी बुलेटचालकाविरोधात गुन्हा नोंद केला आहे.

कुडचडे परिसरातील क्लेवन फर्नांडिस हे बुलेट मोटारसायकलवरून कोटार्लीहून दांडो-सांगेच्या दिशेने जात होते. त्यावेळी त्यांनी मोटारसायकल भरधाव वेगात आणि निष्काळजीपणे चालविल्याचा आरोप आहे.

कोटार्ली परिसरात पोहोचल्यावर बुलेट मोटारसायकलने दांडोहून मळकर्णेच्या दिशेने जाणाऱ्या ॲक्टिव्हा स्कूटरला जोरदार धडक दिली. या धडकेमुळे दोन्ही वाहने रस्त्यावर कोसळली आणि परिसरात एकच गोंधळ उडाला. ॲक्टिव्हा स्कूटर चालवत असलेल्या केवण-कोळंब येथील प्रेमा गावकर जखमी झाल्या. तसेच बुलेट मोटारसायकल चालक क्लेवन फर्नांडिस हेही जखमी झाले. बुलेटवर मागे बसलेले बागवाडा-सर्वण येथील मिहीर कुडतरकर हेही जखमी झाले.

घटनेनंतर स्थानिक नागरिकांनी तातडीने मदतीसाठी धाव घेतली. जखमींना त्वरित उपचारासाठी दक्षिण गोवा जिल्हा इस्‍पितळात दाखल करण्यात आले. सांगे पोलिसांनी पंचनामा केला.

बेदरकारपणा नडला

प्राथमिक तपासात निष्काळजी आणि बेदरकार वाहन चालविल्‍यामुळे अपघात घडल्याचे समोर आल्याने सांगे पोलिसांनी बुलेटचालकाविरुद्ध गुन्हा दाखल केला आहे.सांगे साहाय्यक पोलिस उपनिरीक्षक रामदास गावकर यांनी या प्रकरणी तक्रार केली. तेच या प्रकरणाचा तपास करत आहेत.