सासष्टी: जलस्त्रोतमंत्री सुभाष शिरोडकर सांगतात की गोव्यात पाणी टंचाई होणार नाही एवढा पाण्याचा साठा आहे. मात्र, परिस्थिती याच्या उलट आहे. सासष्टीतील राय, नावेली, बाणावली, कोलवा, कुडतरी व मडगावमधील काही भागांत पाणी टंचाईमुळे नागरिकांमध्ये नाराजी पसरली आहे. सरकारने त्वरित पाणीपुरवठा सुरळीत करावा, अशी मागणी या भागातील लोक करू लागले आहेत.

पाणी टंचाई परिस्थिती गत दोन आठवड्यापासून सुरू असल्याचे लोक सांगतात. त्यांना आता बाजारातील बाटलीबंद पाण्यावर अवलंबून रहावे लागत आहे.

ही या वर्षीचीच बाब नसून दरवर्षी आम्हाला या समस्येला तोंड द्यावे लागत आहे, असे कोलवा येथील रहिवासी मिलाग्रेस फर्नांडिस यांनी सांगितले. गेल्या कित्येक वर्षांपासून ही बाब आम्ही सरकारच्या कानावर घालत आहोत. मात्र, त्याचे निरसन केले जात नसल्याचे फर्नांडिस यांनी सांगितले. नावेलीत केवळ एका तासासाठी पाणीपुरवठा होत आहे.

पाण्याची टंचाईमुळे नागरिकांबरोबरच रेस्टोरंट, आरोग्य केंद्र यांच्यावरसुद्धा परिणाम होताना दिसत आहे. पाणी टंचाईविरोधात हाऊसिंग बोर्ड घोगळमधील नागरिक आंदोलनाच्या पवित्र्यात आहेत. संबंधित खात्याकडे तक्रारी करूनही ठोस उपाययोजना केली जात नाही. पाणीपुरवठ्याची जीर्ण झालेली जलवाहिनी, दुरुस्ती व देखरेखीचा अभाव ही या पाणी टंचाईमागची कारणे आहेत.