Goa Tourist Attack: गोव्यात वाढत्या गुन्हेगारी घटनांवर आळा घालण्यासाठी सरकार आणि गोवा पोलिस नेहमीच सतर्क असूनही अशा घटना थांबण्याचे नाव घेत नाहीत. विशेषत: गोव्यात येणाऱ्या पर्यटकांबाबत घडणाऱ्या गुन्ह्यांनी सरकारची डोकेदुखी आणखीच वाढवली आहे. हणजूण पर्यटक हल्ल्यानंतर आता अजून एक पर्यटक हल्ल्याची घटना समोर आली आहे.

काय आहे प्रकरण?

मिळालेल्या माहितीनुसार, मोरजीतल्या एका हॉटेलमध्ये एक रशियन महिला पर्यटक Aigul Davletianova (वय 30) राहण्यास आली होती. तिच्यावर हॉटेलमध्येच काम करणाऱ्या काही कामगारांनी हल्ला केल्याचे समोर आले आहे. अबिनाश गोरिया (आसाम) आणि मोहोम्मद खान (झारखंड) हे दोघेजण त्याच हॉटेलमध्ये काम करतात. ते रात्री महिला राहत असलेल्या रूमच्या खिडकीमधून आत आले.

आवाजामुळे ती झोपेतून उठली असता त्यांनी तिच्यावर हल्ला करत तिचे हात आणि तोंड घट्ट आवळले. यामुळे तिच्या ओठांना जखम झाली असून तिचा एक दातही तुटल्याचे सांगण्यात येत आहे. या संपूर्ण घटनेमुळे परिसरात खळबळ मजली असून पेडणे पोलिसांनी या दोघांनाही ताब्यात घेतले आहे. पोलिस या घटनेचा पुढील तपास करत आहेत.