सभापती रमेश तवडकर यांच्या संदर्भात विधानसभेबाहेर आक्षेपार्ह वक्तव्य केल्याप्रकरणी केप्याचे आमदार एल्टन डिकॉस्ता यांनी माफी मागावी, या मागणीसाठी सत्ताधारी आज विधानसभेत आक्रमक झाले.

खुद्द मुख्यमंत्री डॉ. प्रमोद सावंत यांनी हा विषय लावून धरला. यावेळी प्रेक्षागृहात भाजपचे प्रदेशाध्यक्ष सदानंद शेट तानावडे उपस्थित होते.

विरोधी पक्षनेते युरी आलेमाव यांनी डिकॉस्ता हक्कभंग ठरावाला सामोरे जातील, पण माफी मागणार नाहीत, अशी भूमिका घेतली. डिकॉस्ता यांनी मी काय गुन्हा केला, असे विचारण्याचा प्रयत्नही केला. या गदारोळात दोन वेळा विधानसभेचे कामकाज तहकूब करावे लागले आणि प्रश्नोत्तराच्या तासाचे कामकाजच झाले नाही.

सरकारी पक्षाने हे मुद्दाम केले. सरकारला नव्या शैक्षणिक धोरणाविषयी प्रश्नांना सामोरे जायचे नव्हते. विरोधकांना सरकार घाबरले, त्यामुळे त्यांनीच हा प्रश्नोत्तर तास गुंडाळला असा आरोप गोवा फॉरवर्डचे अध्यक्ष विजय सरदेसाई दुपारच्या सत्रात विधानसभा संकुलात घेतलेल्या पत्रकार परिषदेत केला. यावेळी त्यांच्यासोबत हळदोण्याचे आमदार अॅड कार्लस फेरेरा होते.

सरदेसाई म्हणाले, हे प्रश्न चर्चेला येऊ नयेत, यासाठी पडद्याआड अनेक घडामोडी गेल्या २४ तासात घडल्या. हक्कभंग ठराव आणण्यात येणार आणि त्याआधारे सत्ताधारीच कामकाज होऊ देणार नाहीत, याचा विचार देखील आम्ही केला नव्हता.

सर्वसाधारणपणे विरोधक कामकाज बंद पाडतात, पण प्रथमच सत्ताधाऱ्यांनी कामकाज बंद केलेले आम्ही पाहिले. शैक्षणिक धोरण व वीज दरवाढ हे प्रश्न सरकारला अडचणीचे होते.