पणजी: कोरोनाच्या (COVID-19) ओमिक्रोन (omicron variant) या नव्या व्हेरियंटला रोखण्यासाठी राज्य सरकारने (Goa Government) आरोग्य विभागाची उच्चस्तरीय बैठक घेत केंद्र सरकारच्या सर्व नियमांच्या पालन करण्याबरोबर विमान आणि बोटमार्गे येणाऱ्या सर्व आंतरराष्ट्रीय प्रवाशांची आरटीपीसीआर चाचणी (RTPCR test) सक्तीची केली आहे. केंद्र सरकारने अधिकृत केलेल्या ‘त्या’ 12 देशातील प्रवाशांना सक्तीचे सात दिवसांचे क्वारंटाईन करण्यात येणार आहे, अशी माहिती मुख्यमंत्री डॉ. प्रमोद सावंत (CM Pramod Sawant) यांनी दिली.

ओमिक्रोनला रोखण्यासाठी आज तातडीची उच्चस्तरीय बैठक झाली. यात मुख्यमंत्र्यांसोबत आरोग्यमंत्री विश्वजित राणे, आरोग्य सचिव रवी धवन, दक्षिण गोवा जिल्हाधिकारी रुचिका कटयाल, उत्तर गोवा जिल्हाधिकारी अजित रॉय, आरोग्य विभागाच्या संचालिका डॉ. आयरा, कृती दल सदस्य आणि गोवा वैद्यकीय महाविद्यालयाचे डीन डॉ. शिवानंद बांदेकर आदी उपस्थित होते.