मडगाव: मालभाट येथून एक धक्कादायक प्रकार समोर आला आहे. एका तरूणाला चाकूचा धाक दाखवत व हातोड्याने मारहाण करत मोबाईल, एअर बर्ड्स आणि रोख रक्कम असा सुमारे १२ हजार रुपयांचा मुद्देमाल लुटल्याची घटना समोर आली. या प्रकरणात मडगाव पोलिसांनी चौघांना अटक केली असून, त्यांना पाच दिवसांची पोलीस कोठडी सुनावण्यात आली आहे.

पोलिसांनी दिलेल्या माहितीनुसार, अटक करण्यात आलेल्या आरोपींची नावे अस्लम शेख, दीपक सहानी, आफताब खान आणि आकाश बोटे अशी आहेत. ही घटना शुक्रवारी ९ मे रोजी सकाळच्या सुमारास सोनू तिर्की या तरूणासोबत घडली.

हा तरुण शाही दरबार हॉटेलमध्ये काम करतो. तो आपल्या मित्राला रेल्वे स्थानकावर सोडून परतत असताना मालभाट परिसरात त्याला अडवून चाकूचा धाक दाखवण्यात आला आणि त्याच्यावर हातोड्याने हल्ला करण्यात आला.

या हल्ल्यानंतर आरोपींनी त्याच्याकडील रेडमी कंपनीचा मोबाईल, एअर बर्ड्स आणि ४०० रुपये रोख असा एकूण १२ हजार ४०० रुपयांचा मुद्देमाल हिसकावून पळ काढला. घडलेल्या प्रकारानंतर सोनू तिर्कीने मडगाव पोलीस स्थानकात तक्रार दाखल केली.

पोलीस निरीक्षक सूरज सामंत यांच्या मार्गदर्शनाखाली पोलीस उपनिरीक्षक समीर गावकर यांनी कारवाई करत चारही आरोपींना ताब्यात घेतलं. अटकेनंतर त्यांना न्यायालयात हजर करण्यात आले असता, न्यायालयानं त्यांना ५ दिवसांची पोलीस कोठडी सुनावली.