मोरजी : पोरस्कडे पेडणे रेल्वे पुलाच्या बाजूला राष्ट्रीय महामार्ग ६६ लगत नदीच्या पात्रात टाकलेला मातीचा भराव हळूहळू खचत असल्याचे चित्र दिसत आहे. यावर सरकारने त्वरित उपाययोजना करावी, अशी मागणी नागरिक करत आहेत. राष्ट्रीय महामार्ग ६६ चे काम एमव्हीआर कंपनी करत आहे. राष्ट्रीय महामार्गाचे काम पोरस्कडे रेल्वे पुलाजवळ धोकादायक बनलेले आहे. या ठिकाणी ३ वर्षांपूर्वी रस्ता पाण्यात गेला होता.

१०० मीटर रस्ता आणि संरक्षक भिंत तेरेखोल नदीने गिळंकृत केली होती. त्यानंतरही सरकारला आणि कंत्राटदाराला जाग आली नाही. या रस्त्यालगत ज्या पद्धतीने सरकारच्या कंत्राटदाराने तेरेखोल नदीच्या पात्रात मातीचा भराव टाकून रस्ता तयार केला. त्या अगोदर त्यांनी संरक्षक भिंत उभारण्याची गरज होती.

कचराही नदीतच

प्रवाहाबरोबर मातीही हळूहळू नदीत जात आहे. शिवाय काहीजण टाकाऊ बांधकाम साहित्य टाकत असल्याचेही दिसत आहे. भविष्यात उर्वरित रस्ता पाण्यात जाऊन मोठी दुर्घटना घडू शकते. यावर सरकारने त्वरित उपाययोजना करावी अशी मागणी केली जात आहे.