वास्को: ऋषी नायर या विद्यार्थ्याचा मृत्यू ड्रग्सच्या ओव्हरडोसमुळे झाल्याच्या निष्कर्षानंतर या आठवड्यात बिटस पिलानी कॅम्पसमध्ये येणाऱ्या पार्सलची तपासणी सुरू केली आहे.

गुरुवारी पोलिसांना फुड पॅकेटमध्ये सिगारेटचे पॅकेट आढळल्यामुळे ती ऑर्डर पोलिसांनी रद्द केली आणि ते फुड पॅकेट नष्ट केले. तसेच संबंधित डिलिव्हरी कंपनीला सक्त इशाराही दिला.

या प्रकारानंतर डीआयजी वर्षा शर्मा आणि दक्षिण गोव्याचे पोलिस अधीक्षक टिकम सिंग वर्मा यांच्यासह वरिष्ठ अधिकाऱ्यांनी कॅम्पसला भेट दिली. वसतिगृहाच्या रचनेचा त्यांनी आढावा घेतला आणि सर्व प्रवेशद्वारांवर कडक तपासणी करण्याचा आदेश अधिकाऱ्यांना दिला आहे. दरम्यान, बिट्स पिलानीने आता पायाभूत सुविधांचा विस्तार केला आहे.

कॅम्पसमध्ये बसविले ६०० कॅमेरे

ऋषी नायर याच्या मृत्युनंतर बिट्स पिलानी परिसरातील सुरक्षा व्यवस्थेत अभूतपूर्व बदल करण्यात आला आहे. सर्व पार्सल तपासण्यासाठी वेर्णा पोलिसांना कॅम्पसच्या प्रवेशद्वारांवर तैनात केले आहे तसेच संस्थेने त्यांची वसतिगृहे आणि इतर भागात सुमारे ६०० सीसीटीव्ही कॅमेरे बसविले आहेत.