म्हापसा: रेवोडा येथील एका इमारतीच्या तिसऱ्या मजल्यावरील फ्लॅटला गुरुवारी (ता.४) पहाटे आग लागण्याची घटना उघडकीस आली. यात दोघी युवती किरकोळ जखमी झाल्या. कांचन आसुदली (२३, रा. मूळ बंगळूरू) व प्रिया सेन (२५, रा. बिहार) अशी जखमी झालेल्या युवतींची नावे आहेत.

त्यांना धुरामुळे श्वास घेण्यास त्रास जाणवत होता. ही आग एअर-कंडिशनिंग युनिटमध्ये झालेल्या शॉर्ट सर्किटमुळे लागली असावी, असा प्राथमिक अंदाज आहे. उपलब्ध माहितीनुसार, आग लागली तेव्हा दोघी युवती खोलीत झोपल्या होत्या.

यावेळी आजूबाजूच्या सतर्क शेजाऱ्यांनी प्रसंगावधान दाखवत, युवतींना फ्लॅटमधून सुखरूप बाहेर काढले. या बचाव कार्यात एका स्थानिकालाही किरकोळ दुखापत झाली. जखमी युवतींना म्हापसा जिल्हा रुग्णालयात उपचारासाठी दाखल केले.

या आगीची माहिती मिळताच, म्हापसा अग्निशमन दलाचे पथक घटनास्थळी पोहचले व त्यांनी या आगीवर नियंत्रण मिळवले. या आगीत फ्लॅटमधील वस्तू मोठ्याप्रमाणात जळून खाक झाल्या. सुमारे ५ ते ६ लाखांचे नुकसान झाले आहे. कोलवाळ पोलिसांकडून तपास सुरू आहे.